Të ardhurat për periudhën Janar-Maj 2017, Hoti: U rritën me 3.4% krahasuar me vitin e kaluar
Në mbledhjen e Qeverisë së Kosovës, zhvilluar ditën e stome, ministri i Financave Avdullah Hoti ka prezantuar raportin për të ardhurat dhe shpenzimet për periudhën Janar-Maj 2017.
Ai ka bërë të ditur se të ardhurat kanë shënuar rritje prej 3.4% (20.8 mil€) krahasuar me periudhën e vitit paraprak, nga të cilat të ardhurat vendore u rritën për 6.7 % (11 mil €), ndërsa të ardhurat në kufi prej 2.8% (10 mil €).
“Të ardhurat personale kanë regjistruar rritje prej 6.8%, ndërsa të ardhurat nga niveli lokal tejkaluan planin e parashikimeve për 4.4 mil € apo 15.9% më shumë se periudha e njëjtë e vitit paraprak.”
Gjithashtu ministri tha se të ardhurat e tjera jo-tatimore kanë regjistruar performancë pozitive. Sa i përket shpenzimeve, ministri Avdullah Hoti bëri të ditur se ato kanë shënuar rritje prej 8.9%.
“Kjo rritje ka ardhur nga rritja e shpenzimeve kapitale, pasuar nga kategoria e subvencioneve dhe transferimeve. Shpenzimet totale gjatë kësaj periudhe janë ekzekutuar me normë prej 99.7%”.
Ministri Hoti gjithashtu informoj kabinetin qeveritar se në bazë të analizave të Ministrisë së Financave, deri në fund të vitit pritet të ketë mungesë të mjeteve buxhetore për skemat sociale, për autostradën Prishtinë – Hani Elezit dhe për zgjedhjet lokale. Ai gjithashtu theksoi se duhet të shlyejmë borxhin lidhur me pasaportat ndaj operatorit austriak në shumën e 5.3 milionë eurove.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.