Të dhëna pozitive për Britaninë – Ndërtimi tregon performancën më të mirë në 7 muaj 

Industria e ndërtimit në Britani ka vazhduar rimëkëmbjen, duke lënë pas ngadalësimin e fillimit të vitit, ndërkohë që Qershori ka treguar performancën më të fortë në 7 muaj.

Megjithatë, kompanitë kanë pasur shqetësime përpara daljes nga Bashkimi Europian, sipas sondazheve. Indeksi PMI për sektorin, që formulohet nëpërmjet mijëra sondazhesh drejt firmave,  u rrit në 53.1 pikë, që është sipër 50 pikëshit që ndan tkurrjen nga ekspansioni.

Treguesi rezultoi në rritje për të tretin muaj radhazi,  pas tkurrjes që erdhi në Mars.  Porositë e reja janë rritur me normën më të shpejtë që prej muajit Maj 2017 dhe ritmi i krijimit të vendeve të punës ishte më i shpejti në 1 vit.

Pritshmëritë e bizneseve janë përmirësuar gjithashtu, por poshtë nivelit të një viti më parë. Banka e Anglisë kërkon të sigurohet që stanjacioni i ekonomisë gjatë fillimit të vitit ishte i përkohshëm dhe jo një pasqyrim i shqetësimeve për daljen nga Bashkimi Europian, përpara se të rrisë normat e interesit.

Ndërtimi përbën 6% të ekonomisë britanike. Sektori i manifakturës që zë 10%, ka rifituar gjithashtu vrull në Qershor. Sipas kompanisë që ka ndërmarrë sondazhet, ndërtimi ka marrë nxitje nga pronat rezidenciale dhe tregtare.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.