Të drejtat e furnizimit me energji – ERE shton detyrimet ndaj FSHU: Anketë për matjen e kënaqësisë ndaj shërbimit
Enti Rregullator i Energjisë ka vendosur detyrime shtesë ndaj Furnizuesit të Shërbimit Universal, në drejtim të respektimit të të drejtave të klientëve për furnizimin me energji elektrike. Sipas ndryshimeve, kompania furnizuese tashmë ka detyrimin që të njoftojë klientin mbi të drejtën e ushtrimit të ankesës tek Furnizuesi dhe në ERE. Gjithashtu, furnizuesi ka detyrimin të njoftojë në çdo rast klientin që ka paraqitur një ankesë për zgjidhjen e dhënë zyrtarisht, dhe jo vetëm ta zgjidhë.
Nga ana tjetër FSHU do të duhet të masë nivelin e kënaqësisë së klientëve nëpërmjet organizimit të anketave që adresojnë në mënyrë të posaçme, kohën e kthimit të përgjigjeve dhe zgjidhjeve për problematikat e adresuara prej tyre, si dhe të administrojë dhe të bëjë vlerësimet përkatëse në analizë të gjetjeve nga komentet e klientëve dhe të publikojë këto rezultate ne faqen zyrtare. Gjithashtu, furnizuesi duhet të mbajë një database të opinioneve/propozimeve të stafit apo klientëve me qëllim përmirësimin e shërbimit dhe mënyrës së adresimit të tyre, ndërsa duhet të sigurohet që stafi është në gjendje të adresojë në çast problematika që lidhen me marrjen e informacionit të kërkuar nga klienti.
Detyrimet e reja të vendosur nga ERE u bën pas Rezolutës së Kuvendit, që ndër të tjera i kërkoi Entit Rregulaltor të vijojë punën për monitorimin dhe përditësimin e planit të masave në drejtim të mbrojtjes së konsumatorit sipas fushës së veprimtarisë së shoqërive të krijuara nga ndaj e OSHEE-së.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.