Të dytët në rajon për depozita – Statistikat e “EBF” për bankat, Shqipëria vetëm pas Serbisë
Federata Europiane e Bankave për herë të parë ka përfshirë edhe Shqipërinë në statistikat e saj.
Ajo që bie në sy qysh në krye të herës nga shifrat është fakti se Shqipëria është vendi i dytë në rajon për nga totali i depozitave në sektorin bankar, plot 11.7 miliardë euro sipas të dhënave më të fundit në dispozicion. 8.3 miliardë euro prej tyre janë në bankat tregtare, ndërkohë që 85% janë depozita familjare.
Vetëm Serbia, me 16.7 miliardë euro, ka më shumë para në sektorin bankar në formën e depozitave. Të gjitha vendet e tjera të rajonit vijnë pas Shqipërisë.
Kosova nuk është pjesë e këtyre të dhënave, por gjithsesi shifra e totalit të depozitave është modeste, në pak më shumë se 3 miliardë euro.
Me një popullsi 2.5 herë më madhe se vendi ynë, praktikisht, diferenca me Serbinë në këtë drejtim bëhet nul.
Kur bëhet fjalë për totalin e kredive ndërkohë, me rreth 5.7 miliardë euro në të gjithë sistemin, Shqipëria zbret në vendin e 3-të në rajonin e Ballkanit Perëndimor, me Bosnje Hercegovinën që ngjitet në vend të dytë, me plot 9.4 miliardë euro kredi.
Edhe sa i përket aseteve të sistemit bankar, Shqipëria renditet e treta në rajon. Në çdo indikator, Serbia zë vendin e parë, ndërkohë që Moldavia zë vendin e fundit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.