Të fundit në rajon për ujin – Por të parët për burime, aksesi mbetet problem

Një ndër prioritet kryesore të qeverisë “Rama 2”, është vendosur pikërisht çështja e ujit. Plani i qeverisë, siç u njoftua nga vetë Kryeministri do të nisë me një aksion të gjerë për të zhdukur informalitetin dhe shpërdorimin e ujit të pijshëm, me synimin për të reduktuar mungesën e ujit për familjarët dhe bizneset, që është një ndër problematikat më të mëdha.

Disa të dhëna, tregojnë se, në drejtim të ujit të pijshëm dhe aksesit në të, Shqipëria është jo vetëm vendi i fundit në rajon, por edhe që ka bërë hapa prapa gjatë viteve të fundit në këtë drejtim.

Të dhënat e përpunuara nga FAO, tregojnë se, në vendin tonë, aksesi i popullsisë në ujin e pijshëm të sigurtë fiksohet pranë 95.1%. Siç vihet re qartë, ndër vendet e tjera të rajonit, kjo është norma më e ulët.

Të gjitha vendet e tjera të rajonit i afrohen shifrës së 100%. Në vitin 2007, kjo normë fiksohej në 95.9% në vendin tonë, çka tregon se, janë bërë hapa prapa. Përkeqësimi më i madh ka ndodhur në zonat urbane, ku norma ka zbritur nga 97.6% në 2997, në 94.9% në vitin 2015.

Madje, në vitin 2002 tregojnë të dhënat e Organizatës për Ushqim dhe Agro-bujqësi të Kombeve të Bashkuara, kjo normë fiksohej në 99.5%.

Kur bëhet fjalë për burimet ujore për frymë ndërkohë, situate ndryshon tërësisht, dhe Shqipëria ngjitet në vend të parë në rajon me 9200 metër kub për frymë, po aq sa Bosnje Hercegovina thonë të dhëna të tjera nga Banka Botërore.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.