Të fundit për shpenzime në NATO – Shqipëria vetëm 58 dollarë për frymë, shumë larg objektivit për 2% të PBB

Raporti më i fundit i Aleancës së Atlantikut Verior (NATO) sa i përket shpenzimeve për mbrojtjen e vendeve anëtare, e që mban datën 29 nëntor, tregon me shifra konkrete se sa po i respekton secili vend detyrimet.

Pavarësisht se ka një rritje të ndjeshme në terma absolutë të shpenzimeve për mbrojtjen në terma absolutë, Shqipëria vijon të jetë shumë larg objektivit dhe rregullave të NATO-s, për shpenzime në 2% të prodhimit kombëtar. Raporti vlerëson se në 2019-ën shpenzimet e Shqipërisë për mbrojtjen fiksohen në vetëm 1.26% të Prodhimit të Brendshëm Bruto, që është një prej normave më të ulta ndër vendet e aleancës.

Në terma absolutë ndërkohë, shpenzimi fiksohet në $198 milionë, vendi i parafundit pas Malit të Zi. Për frymë ndërkohë, me vetëm 58 dollarë, Shqipëria është padiskutim në vend të fundit mes të gjitha vendeve të aleancës, më shumë se dy herë më pak se vendi i parafundit, Mali i Zi, me 127 dollarë për frymë.

Nga shumë totale e shpenzimeve vjetore për mbrojtjen, vendi ynë kanalizon vetëm 14% të totalit për pajisje dhe logjistikë, ndërsa pjesa më e madhe, rreth 64%, shkon për pagat e rreth 6800 anëtarëve të forcave të armatosura.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.