Të gjitha kompanitë duhet të regjistrojnë orarin e punës së punonjësve – Rregullat e reja të BE-së
Kompanitë që operojnë në vendet anëtare të BE duhet të krijojnë një sistem për të regjistruar kohën e punës të anëtarëve të tyre të stafit, kështu ka vendosur Gjykata Evropiane e Drejtësisë (ECJ).
Gjykata tha se ishte e nevojshme të regjistrohen orët e punonjësve në mënyrë që kufijtë ligjorë të punës të zbatohen siç duhet.
“Për të siguruar efektivitetin e të drejtave të parashikuara në Direktivën dhe kartën për Kohën e Punës, Shtetet Anëtare duhet të kërkojnë nga punëdhënësit që të krijojnë një sistem objektiv, të besueshëm dhe të aksesueshëm, që mundëson matjen e kohëzgjatjes së punës së përditshme të çdo punonjësi”, tha ECJ në një deklaratë. Çdo shtet do të jetë i lirë ta përcaktojë vetë se si ta zbatojë një sistem të tillë, vijon deklarata.
Vendimi i 14 majit vjen pas një çështjeje të sjellë në ECJ nga Federata e Shërbimeve të Komisioneve Obreras (CCOO), një sindikatë spanjolle që kërkoi që Deutsche Bank të jetë e detyruar të ngrejë një sistem regjistrimi të orëve të punës për punonjësit e saj në Spanjë.
“BE konsideroi se një sistem i tillë do të bënte të mundur verifikimin e përputhjes me afatet e përcaktuara të punës dhe detyrimin, të parashikuar në ligjin kombëtar, për t’u dhënë përfaqësuesve të sindikatave informacione për punën jashtë orarit për çdo muaj”, tha ECJ.
Deutsche Bank nuk regjistronte orarin e punës të punonjësve të saj sepse sipas tyre ligji spanjoll kërkon vetëm që të mbajë një rekord të orëve të punës jashtë orarit nga anëtarët e stafit.
Sipas informacioneve të cituara në deklaratën e ECJ-së, 53.7% e orëve të punës jashtë orarit në Spanjë nuk regjistrohen. Kompanitë spanjolle gjithashtu janë të detyruara të njohin saktësisht numrin e orëve normale të punës për të përcaktuar nëse puna jashtë orarit është kryer.
Burimi: Euronews
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.