Të infektuarit pa simptoma/ Më pak se 8 në 10,000 persona të testuar në Vuhan!

Rezultatet e testeve të acidit nukleik tregojnë se proporcioni i të infektuarve pa simptoma me koronavirus në qytetin e Vuhanit, ku u shfaq virusi për herë të parë, është më pak se 8 në 10,000 persona që kanë ndërmarrë testin. Ndërkohë që masat e karantinës në Vuhan janë hequr më 8 Prill dhe vendi ka rifilluar punën,  autoritetet janë shqetësuar për mundësinë e një përhapjeje të re të infeksionit nga njerëzit që vijnë jashtë vendit, që mund të jenë të infektuar dhe nuk shfaqin simptoma.

Provinca e Hubeit,  që ka qendër Vuhanin, është goditur më rëndë nga epidemia.  Zv/Kryebashkiaku i Vuhanit, Hu Yabo, tha se qeveria lokale ka shtuar masat e identifikimit të rasteve pa simptoma, në mënyrë që të vlerësojë përmasën e këtyre rasteve dhe të zbusë shqetësimet mbi bartësit e fshehtë të virusit.

“Një total prej 226,00 testesh të acidit nukleik janë zhvilluar në 7 ditët e fundit, që kur u hoqën masat e karantinës në Vuhan, dhe janë zbuluar 130 të infektuar pa simptoma, apo 5 në 10,000 persona”,  tha ai, duke shtuar se kompanitë që kanë rinisur punën kanë zhvilluar gjithashtu testime të punëtorëve, ku proporcioni rezultoi në më pak se 8 në 10 mijë persona të testuar.    Raportimi i shpejtë i rasteve pa simptoma, gjurmimi i kontakteve të afërta të tyre, testimi i shpeshtë për rastet e pa identifikuara dhe monitorimi i zgjatur mjekësor, janë ndër masat që po ndërmerr Vuhani, për të ulur rrezikun e një rikthimi të infeksionit.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.