Të investosh për një trup të shëndetshëm! Intervistë me blogeren Çenkuela Hasa
Blogu është trendi i kohëve të fundit që po promovohet gjerësisht, ku blogerët shprehin pasionet dhe përkushtimin e tyre, duke ndikuar te mijëra ndjekës në rrjetet sociale. Këto pasione duket se nisin nga eksperiencat personale, për t’u kthyer më vonë në profesione. Nëse do kërkosh, blogerët janë të fushave të ndryshme duke filluar që nga moda, make-up, fitness, ushqimi, etj. Në këtë shkrim kemi zgjedhur të intervistojmë Çenkuela Hasan; një blogere për healthy lifestyle, në gjuhën e blogut, apo në shqip, për një jetë të shëndetshme. Çenkuela, me profesion gazetare, ndan çdo ditë me ndjekësit e saj receta dhe ushtrime palestre duke motivuar dhe promovuar çdo ditë sesi të jetojmë shëndetshëm.
Si lindi ideja për të patur një blog?
Të kesh një blog personal do të thotë që të duhet të ndash gjërat e tua shumë personale për një fushë të caktuar. Fillova të ndryshoj stil jete dhe pashë te vetja ndryshime fantastike, të cilat nuk mund të rrija pa i shpërndarë me miqtë e mi. Kështu vendosa të flas më shumë, nëpërmjet fotove motivuese, recetave, etj. Thjesht, çdo ditë, ndaja ato që bëja.
Ç’do të thotë të kesh një stil të shëndetshëm jete?
Të kesh një stil, të mos mbash dieta për një periudhë kohe, për të patur linja të bukura, por të kesh një mënyrë jetese, ku në çdo zgjedhje, ti tregon kujdes për shëndetin. Të jesh përzgjedhës kur bën pazaret; të gatuash në mënyrën e duhur; të mos e lësh trupin e uritur, por t’i japësh ato ushqime që ai realisht ka nevojë; të hash, aq sa i duhet organizmit tënd dhe mos e teprosh. Një stil i shëndetshëm, ndërkohë, nuk ka kuptim pa aktivitet fizik.
Çfarë ushqimesh sugjeron që duhet të jenë patjetër në regjimin tonë?
Janë shumë, por perimet të gatuara në mënyrë “al dente”, për t’i ruajtur vlerat duhet t’i konsumojmë çdo ditë. Nga ana tjetër, nuk duhen lënë mënjanë frutat, ushqimet me proteina si: veza, qumështi, peshku, gjiza, etj. Pastaj vijnë fibrat dhe karbohidrate, të cilat i marrim nëpërmjet orizit, miellit integral, makaronave, quinoas dhe tërshërës që është shumë e shëndetshme për organizmin dhe e pasur me fibra. Nuk duhet harruar për të pirë sa më shumë ujë për të qenë të hidratuar.
Si mund të kemi një trup të bukur?
Kjo është pyetja që më bëhet çdo ditë, në fakt. Unë mendoj që çdo fizik është i bukur, nëse ne vendosim ta vëmë në dukje. Nga çdo fizik mund të merret maksimumi i gjeneve tona. Në fillim, të pranojmë veten dhe mos krahasohemi. Ky është hapi parë i parë; të pranojmë veten dhe të punojmë për ta përmirësuar. Dy janë rrugët kryesore: ushqimi i duhur dhe aktiviteti fizik. Alternimi i të dyjave do t’ju mbajë gjithmonë në formë. Por çdo gjë do kohën e duhur dhe durim, që shpesh mungon te njerëzit me të cilët komunikoj. Kjo është arsyeja kryesore, se përse, disa ia dalin dhe disa, jo.
Sa orë aktivitet duhen në ditë?
Kjo varet nga shumë faktorë dhe në këtë rast, nuk shkon shprehja, “sa më shumë, aq më mirë.” Një atlet stërvitet shumë më shumë se një njeri i zakonshëm. Jo të gjithë kanë shumë kohë të lirë, për shkak të angazhimeve në punë dhe familje, por ky nuk është justifikim. Për të qenë në formë, brenda dhe jashtë, të gjithë mund të gjejnë një orë të lirë në ditë. Duhet theksuar se, përfitimet janë të shumta edhe nga ana shëndetësore dhe shpirtërore. Vetëm nga një shëtitje, e alternuar me vrap në natyrë, mund të përmirësohet sistemi kardiovaskular, frymëmarrja, kolesteroli, dhjamosja organeve dhe çlirohemi nga stresi. Në fund të çdo stërvitjeje, më duket sikur kam rilindur. Do ndjeheni më të rinj fizikisht dhe shpirtërisht.
Nga komunikimet që ke me ndjekësit, cilat janë gabimet që bëjnë më shpesh me ushqimin?
Hanë rrallë dhe shumë. Nuk konsumojnë mëngjes duke menduar që kjo do t’i ndihmojë të jenë më në formë, ndërkohë që mëngjesi duhet të jetë i bollshëm, i pasur me fibra dhe proteina, për t’i dhënë trupit energjinë e duhur për të vazhduar ditën. Konsumojnë darkën në orët e vona; një traditë shqiptare, që vazhdon ende sot. Janë shumë të dhënë pas bukës apo brumërave, në përgjithësi. Gatuhet në mënyrë tradicionale, me shumë vaj; perimet kosumohen rrallë, apo dhe kur i gatuajnë në formën e gjellës, i zhveshin nga çdo vlerë ushqimore. Byreku dhe ushqimi i shpejtë përdoret nga të rinjtë çdo ditë, si zgjedhja më e shpejtë, por një copë e vogël byreku ka një çmenduri kalorish. Kjo nuk do të thotë që unë nuk ha asnjëherë byrek, por nuk është pjesë e stilit tim të jetesës. Këto gjëra duken si pa rëndësi, por në fakt janë shkaku për të gjitha sëmundjet që vijnë më pas.
Mesazhi juaj për ata që nuk kanë akoma motivimin e duhur për të filluar?
Investimi për trupin dhe shëndetin tuaj është gjëja më e mirë që mund të bëni. Asnjëherë nuk është vonë për të filluar!
Çfarë konsumoni ju në një ditë dhe cila do ishte dita ideale?
Një ditë e shëndetshme është ajo që ka balancë midis makro-nutrienëve; pra, ditë e pasur me fibra, proteina, karbohidrate dhe drithëra. Më poshtë po ju jap një shembull:
Mëngjesi:1 gotë qumësht, omëletë me vezë, një fetë buke integrale.
Paradreka: një frut
Dreka: perime të ziera, fileto pule, ose peshku.
Paradarka: fruta të thata
Darka: disa perime në avull dhe një copë djathë, pa kripë.
Enxhi Biba/ SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.