Të papunët humbin besimin tek zanatet – Vetëm 12.8 përqind ndjekin një kurs profesional
Punëkërkuesit e papunë të regjistruar në zyrat e punësimit në të gjithë vendin kanë humbur besimin se marrja e një zanati mund t’i integrojë në treg, dhe pse është thënë se trajnimi i tyre do të jetë një politikë e detyrueshme nga ana e qeverisë. Kështu, sipas të dhënave të INSTAT të pasqyruara në anketën “Burra dhe gra 2020”, numri i punëkërkuesve të papunë ka pësuar një rënie progresive nga vitit në vit, ku në 2019-ën, regjistrohet në 68.589 individë, nga të cilët 32.066 janë të gjinisë mashkullore dhe 36.523.
Nga shifrat e përpunuara nga SCAN, ajo që vihet re është se nga këta, punëkërkues të papunë të regjistruar në kurse të formimit profesional për vitin 2019 rezultojnë në total vetëm 8818 individë, apo 12.8 për qind në total. Pjesëmarrjen më të lartë në kurset e formimit profesional e kanë burrat me 4936 të regjistruar dhe më pak gratë me 3889.
Po të bëjmë një krahasim që nga viti 2015, shifrat kanë ardhur në rënie të vazhdueshme ndër vite, duke u përgjysmuar gjatë 2019-ës. Në vitin 2015, regjistroheshin 18126 punëkërkues të papunë që ndiqnin kurset profesionale. Kjo tregon se politikat e qeverisë në këtë drejtim nuk kanë pasur sukses dhe po ashtu ka një mungesë besimi se këto trajnime apo pajisja me certifikatat përkatëse, mund të sigurojnë një vend pune.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.