“Të pavaksinuarit, të paguajnë një taksë” – Autoritetet në Kebek planifikojnë masën që pritet të nxisë debat!
Kebeku, provinca më e madhe në Kanada, po planifikon të detyrojë të rriturit që refuzojnë të vaksinohen ndaj Covid-19, që të pagujanë një “kontribut shëndetësor”, një lëvizje që pritet të nxisë debat mbi të drejtat e individit dhe përgjegjësisë sociale. Kryeministri Francois Legault, tha se propozimi, që nuk është përfunduar ende me detaje, nuk do të aplikohet tek ata që nuk mund të vaksinohen dot për arsye shëndetësore.
Të pavaksinuarit shkaktojnë një barrë financiare ndaj të tjerëve dhe autoriteti financiar i Kebekut po përcakton një sasi të rëndësishme që të pavaksinuarve do t’i kërkohet të paguajnë, sipas Legault, që shtoi se kjo sasi, nuk do të jetë më pak se 80 dollarë amerikanë (100C$). Qeveritë në botë kanë vendosur kufizime në lëvizje për të pavaksinuarit dhe shumë pak kanë aplikuar gjoba. Por një taksë gjithëpërfshirëse ndaj të gjithë të rriturve të pavaksinuar, mund të jetë një lëvizje e rrallë dhe kontroverse.
Ndërkohë që një taksë e tillë mund të justifikohet në kontekstin e një emergjence shëndetësore, analistët thonë se me shumë gjasa nuk mund t’i mbijetojë ndonjë beteje ligjore. Sipas ekspertëve, është surprizuese që Qeveria po ndërmerr një hap kaq dramatik në këtë moment, ku ekzistojnë opsione të tjera si zgjerimi i mëtejshëm i detyrimit të vaksinës. Shumë qytete në Kanada po i bëjnë ballë një rritje eksponenciale të rasteve me Covid-19 që ka detyruar dhjetëra mijëra njerëz drejt izolimit dhe ka shtuar barrën tek kujdesi shëndetësor. Varianti Omicron e ka bërë të vështirë që masat kufizuese të ndalojnë përhapjen, dhe ekspertët kanë theksuar rëndësinë e vaksinimit me 2 apo 3 doza.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.