Të punosh për 170 euro në muaj! – E bëjnë 325 mijë shqiptarë, ose afro 27% e të punësuarve

Më shumë se një e katërta e të punësuarve në Shqipëri punojnë për një pagë neto 170 euro në muaj ose më të ulët.

Të dhënat e Instat për tregun e punës në vitin 2018 tregojnë se puna për një pjesë të madhe të shqiptarëve siguron të ardhura në kufijtë e mbijetesës. 26.6% e gjithë të punësuarve ose rreth 325 punonjës marrin një pagë mujore bruto deri në nivelin e pagës minimale, që vitin e kaluar ishte 24 mijë lekë. Në terma neto, kjo pagë siguron një të ardhur prej rreth 21 300 lekësh ose afërsisht 170 euro në muaj.

Në statistikat për nivelin e pagave, Instat iu referohet kryesisht të dhënave administrative. Kjo nënkupton se, në disa raste, pagat reale edhe mund të jenë më të larta nga ato që deklarohen për efekt të pagesës së tatimeve dhe kontributeve. Pavarësisht se informaliteti është një faktor që duhet marrë në konsideratë, sërish puna kundrejt pagës minimale është një realitet i prekshëm në shumë sektorë të ekonomisë. Sidomos në sektorin fason, krahu i lirë i punës dhe pagesat e mjerueshme shihen si çelësi i konkurrueshmërisë së ndërmarrjeve. Në sektorë të tjerë, si bar-restorantet, shpesh pagat janë edhe më të ulëta se ajo minimale.

Brishtësia dhe varfëria e tregut të punës në Shqipëri duket qartë edhe në tregues të tjerë. Sipas Instat, 262 mijë shqiptarë ose 21.6% e numrit total të të punësuarve janë punëtorë pa pagesë në biznesin familjar. Mbështetur në të dhënat e disponueshme, mund të tentojmë të llogarisim me përafërsi sa janë të ardhurat mesatare të një biznesi familjar në Shqipëri. I vetmi burim është anketa strukturore e ndërmarrjeve dhe të dhënat më të fundit i takojnë vitit 2016.

Sipas Instat, në atë vit, ishin afro 97 mijë ndërmarrje me më pak se katër të punësuar, që realizuan gjithsej 40 miliardë lekë fitim. Fitimi mesatar për ndërmarrje rezulton rreth 415 mijë lekë në vit ose më pak se 35 mijë lekë në muaj. Po të llogarisim se shpeshherë këto biznese punësojnë më shumë se një anëtar të familjes, atëherë e ardhura mesatare është edhe më e ulët edhe se paga minimale.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.