Të rinjtë dhe të vjetrit e garës së 25 qershorit! Kush është kandidati më i moshuar dhe ai më i ri?

Sistemi elektoral shqiptar i detyron partitë politike të garojnë në të gjitha zonat e vendit me listë të plotë kandidatësh për deputetë. Në këtë mënyrë, pavarësisht pretendimeve që një parti mund të ketë, ajo është e detyruar të dorëzojë pranë Komisionit Qendror të Zgjedhjeve një listë më të paktën 140 emra kandidatësh për deputetë.

Në disa raste emrat e zgjedhur janë si meritë për kontributin në parti, në disa të tjerë janë emra simbolikë për të treguar mbështetjen ndaj një çështjeje apo kauze, ndërsa në më të shumtën e rasteve, këto emra janë thjesht “për të mbushur listën”.

Kështu, të gjitha zgjedhjet kanë “VIP-at” e tyre që garojnë, por edhe kandidatë që ngjallin kuriozitet, qoftë edhe vetëm për statistikë moshe.

Nga të gjitha partitë që mund të propozonin kandidatin më të vjetër në garë, askush nuk do të ishte më e pritshme se Partia Komuniste e Shqipërisë. Kandidati më i moshuar në këto zgjedhje ka lindur në 25 Mars të vitit 1935, në Kokos të Përmetit, një fshat që tashmë nuk ekziston.

Kandidati 82 vjeçar garon i nënti në zonën e Durrësit. Ai është një agronom me arsim të mesëm, i cili ka punuar si brigadier në bujqësi. Po nga radhët e kësaj partie vjen edhe kandidati i dytë më i vjetër për Kuvendin e Shqipërisë, sërish 82 vjeçar i cili kandidon i shtati në Berat. Këta dy kandidatë i ndajnë vetëm 40 ditë diferencë.

Ndërkohë, kandidatja më e re e këtyre zgjedhjeve ka mbushur vetëm pak javë më parë 18 vjeç dhe Kushtetuta e lejon të garojë për një karrige në Parlament. Ajo garon me Partinë Aleanca Popullore për Drejtësi dhe ka lindur në Itali më 24 Maj 1999. Ajo figuron e regjistruar e 13-ta në Tiranë.

Në total, për zgjedhjet e 25 qershorit, janë regjistruar në KQZ 18 parti me 2.666 kandidatë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.