Të tjera instalacione në kryeqytet – Veliaj: Në negociata për të sjellë “Radurën”

Instalacione të ngjashme me “Renë” do të vendosen edhe në zona të tjera të kryeqytetit. Kjo u bë e ditur nga krybashkiaku i Tiranës, Erion Veliaj gjatë edicionit të dytë të Festivalit të Resë.

I pranishëm në këtë eveniment ku performuan edhe përfaqësues nga Japonia, ishte edhe ambasadori japonez, Makoto Ito.

“Ata që jetojnë në Tiranë e ndiejnë se nuk janë vetëm kalimtarë ose rezidentë të përkohshëm, por duan të lënë një gjurmë fizike ose kreative për qytetin. Po diskutojmë si mund ta zgjasim qëndrimin e Resë në Tiranë, por edhe për të sjellë një instalacion të arkitektit Bjarke Ingels nga galeria Serpentine. E po ashtu, jemi në negociata me Stefano Boerin për të sjellë “Radurën”, një tjetër instalacion që do t’i jepte hijeshi qytetit”, deklaroi Veliaj.

Më tej, duke falënderuar përfaqësuesit e Japonisë që sollën këtë shfaqje në Festivalin e Resë, kryebashkiaku vlerësoi bashkëpunimin e ngushtë mes Bashkisë së Tiranës dhe autoriteteve japoneze për zbatimin e projekteve të përbashkëta.

Këto ditë festivali i Resë ofron një larmishmëri aktivitetesh, si muzikë, kërcim, letërsi arte moderne si dhe performanca të ndryshme artistike ku marrin pjesë 120 artistë nga 15 shtete të ndryshme të botës.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.