Të tjera shenja ngadalësimi në SHBA – Indeksi PMI poshtë 50 pikëve, niveli më i ulët në 1 dekadë
Sektori i manifakturës në SHBA është kontraktuar përgjatë muajit gusht. Sipas të dhënave, indeksi PMI i manifakturës që përpilohet nga Markit ra në 49.9 pikë, gjatë këtij muaji, duke shfaqur shenja të kontraktimit për herë të parë që nga shtatori i vitit 2009, kur kulmonte kriza financiare globale.
Shifrat e gushtit, rezultuan më poshtë se vlera prej 50.4 pikë e regjistruar në muajin korrik. Niveli prej 50 pikësh ndan rritjen nga kontraktimi dhe kjo është e dhëna e radhës që shton mundësitë se ekonomia amerikane mund ti jetë drejtuar recesionit, pavarësisht se zyrtarët e Shtëpisë së Bardhë e kanë mohuar vazhdimisht një skenar të tillë.
Rënia e indeksit kryesor të PMI, reflekton një kontribut shumë të dobët nga porositë e reja, thuhet në njoftim, duke shtuar se blerjen e reja nga kompanitë e manifakturës ranë për herë të dytë në katër muajt e fundit, gjatë gushtit.
Gjithashtu, të dhënat e fundit sinjalizojnë reduktimit më të shpejtë të shitjeve për eksport, që nga gushti i vitit 2009.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.