Të tjera shpenzime për energji – OSHEE hap procedurën e radhës, “thellohet” çështja financiare
Operatori i Shpërndarjes së Energjisë Elektrike do të shpenzojë miliona euro për blerjen e energjisë, me qëllim plotësimin e nevojave konsumatore dhe humbjeve në rrjet gjatë muajit shtator.
Në procedurën e hapur OSHEE kërkon të blejë 180 000 MWh për periudhën 1-30 shtator, ndërkohë që referuar çmimeve mesatare me të cilët është blerë energjia në muajt e fundit parashikohet që vlera e shpenzuar të shkojë në rreth 10 milion euro.
Gjatë këtij viti OSHEE ka rritur ndjeshëm importet, si pasojë e rënies së prodhimit të energjisë për shkak të thatësirës. Sipas të dhënave të INSTAT për 6 mujorin, prodhimi i energjisë elektrike u përgjysmua në krahasim me një vit më parë, çka ka sjellë ulje drastike të eksporteve dhe rritje të lartë importeve.
Në gjashtë muaj, Shqipëria importoi 683 GWH energji elektrike, rreth pesë herë më shumë krahasuar me gjysmën e parë të vitit të kaluar. Eksportet energjisë ishin rreth 142 GWH, ndërsa një vit më parë tejkalonin sasinë e 1100 GWH.
Si pasojë e kësaj situate fatura për blerje energjie për periudhën janar-korrik ka arritur në rreth 126.2 milion euro, ndërkohë që shpenzimet e fundit pritet të rëndojnë edhe më tepër financat e OSHEE, që gjithsesi po kalon një situatë të vështirë financiare.
Aktualisht, Operatori i Shpërndarjes, ka shfaqur probleme me likuidimin e faturave ndaj tregtarëve fitues në ankandet e shit-blerjes së energjisë, teksa ka kërkuar nga ERE të përcaktojë vetë afatet për likuidimin e tyre.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.