Tek ish-Kombinati Metalurgjik i Elbasanit-Hapet kompania e prodhimit të pjesëve të këmbimit të automjeteve për markat e njohura botërore!
Kryetari i Grupit Parlamentar të Partisë Socialiste, Taulant Balla i shoqëruar nga kryetari i Bashkisë së Elbasanit, Qazim Sejdini dhe Prefekti i Qarkut, Gledjan Llatja vizituan ambientet e kompanisë “Delmon Group” me kapital francez, e cila ushtron aktivitetin e saj në ish-Kombinatin Metalurgjik të Elbasanit.
Kjo kompani ka punësuar rreth 50 punëtorë dhe vitin që vjen pritet që numri i punonjësve të dyfishohet. Në fjalën e tij, Balla tha se ky projekt garanton rivitalizimin e zonës industriale të Elbasanit.
“Ne do të vazhdojmë t’ju mbështesim. Që në fillim të projektit tuaj kemi parë që është një projekt që garanton rivitalizimin e kësaj zone industriale të Elbasanit. Jemi shumë krenar që viti i parë i punës shkoi më së miri, sepse 1 milion euro eksport nuk është pak dhe me ato që na premtuat ju, në vitin 2019 do të shkojë 4 milionë dhe që do të thotë që në mënyrë të drejtpërdrejtë do të rritet dhe numri i të punësuarve. Bashkë me Gledin, Prefektin e Qarkut, jemi në shërbimin tuaj, sepse për ne rritja e numrit të punësuarve në Elbasan është objektivi kryesor për këtë vit. E kemi nisur mirë, sepse të dhënat e para të këtij viti tregojnë që kemi një rritje të numrit të të punësuarve rishtas në Elbasan e që tregon që gjithë vëmendja jonë për të garantuar sa më shumë njësi prodhim si kjo e juaja, që ka bërë që të kemi si rezultat rritjen e punësimit. Është një lajm i mirë që kompani me emër botëror si “Maserati”, “Peugeot”, “Renault” të prodhojnë pjesë këmbimi këtu në Elbasan, pas “Mercedez Benzit” dhe “Fiatit” që po prodhon këtu. Po kalojmë në një fazë tjetër të sipërmarrjeve që krijojnë vende pune në qarkun tonë, janë pikërisht ato që kemi synuar, sipërmarrje prodhimi të makinerive” tha Balla.
Në vijim të fjalës së tij, Balla tha se shpreson që me kompani të tjera gjermane, franceze dhe italiane vendi të spostohet “në këtë nivel të ri të sipërmarrjeve, të cilat kalojnë nga fasoneria në një prodhim të pjesëve të këmbimit makinerive dhe automjeteve“.
Ndërsa Prefekti i Elbasanit, Gledian Llatja, tha se në bashkëpunim me Zyrën e Punës dhe qendrat profesionale po bëhen përgatitje për të ri- dimensionuar tregun e punës që të ketë një staf të trajnuar.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.