Tender në prag të ‘shkrirjes’ – Ministria e Integrimit jep mbi 12 mln lekë për përkthimin e ligjeve të BE
Ministria e Integrimit ka shpallur fituesin e tenderit për përkthimin e legjislacionit të Bashkimit Europian, me një vlerë mbi 12 milionë lekë. Fituese është kompania “Alba Global Group”, që ishte garuesja e vetme e që ofroi një vlerë shumë pranë fondit limit të vendosur nga ministria.
Sipas buletinit të publikuar nga Agjencia e Prokurimit Publik kjo kompani do të ofrojë shërbimin për një periudhë kohore prej 3.5 muaj e më konkretisht deri në dhjetor të vitit 2017, ndërkohë që sigurimi i kontratës duhet të mbyllet brenda datës 9 shtator.
Tenderi për përkthimin e legjislacionit të Bashkimit Evropian është zhvilluar në një kohë kur procedurat tenderuese janë të pezulluara, përmes një Vendimi të Këshillit të Ministrave. Sipas këtij vendimi, përjashtohen nga ky rregull vetëm kontratat e nënshkruara para hyrjes së tij në fuq si dhe prokurimet për blerje me vlerë të vogël. Gjithashtu, me kërkesë të argumentuar të titullarit të autoritetit kontraktor, për raste të veçanta dhe nevojave urgjente, me miratimin e Kryeministrit, mund të lejohet vijimi i një procedure prokurimi.
Vendimi i qeverisë nuk i specifikon se cilat mund të klasifikohen si nevoja urgjente, por përmes një shkrese të firmosur nga sekretari i Përgjithshëm i Kryeministrisë, Engjëll Agaçi është lejuar vijimi i procedurës në fjalë.
Ndërkaq, referuar strukturës së re të qeverisë, të prezantuar në Asamblenë e Partisë Socialiste në datën 29 gusht, Ministria e Integrimit Europian nuk do të ekzistojë më si dikaster i veçantë, por strukturat e saj do të “shkrihen” me Ministrinë e Punëve të Jashtme. Kjo ministri është drejtuar nga Lëvizja Socialiste për Integrim, si pjesë e koalicionit parazgjedhor të vitit 2013 mes kësaj partie dhe Partisë Socialiste.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.