Tenderat në shëndetësi – 5 kompanitë me vlerë më të lartë financiare

Tenderat e realizuara në sistemin shëndetësor vijojnë të mbeten nga më fitimprurësit për biznesin privat. Nëse bëjmë një renditje të kompanive të cilat kanë fituar tenderat me vlerë më të lartë në sektorin shëndetësor, ato janë pesë.

Në vend të parë është kompania Devis SHPK me mbi një miliardë lekë dhe me një numër të vogël kontratash që është tetë, dy prej të cilave i ka realizuar me spitalin e Traumës.

Në vend të dytë është kompania Biometric Albania shpk me një vlerë prej 824 milionë lekë. Ndërkohë që numri i kontratave të lidhuara është 168 ku 80 prej tyre janë me QSUT-në.

Sipas të dhënave të Open Data me 792 milionë lekë vlerë kontratash të lidhura është Megapharama shpk e cila renditet e treta. Në total kjo kompani ka lidhur 731 kontrata prej të cilave 106 janë me Spitalin Universitar “Nënë Tereza”.

Në vendin e katërt renditet OES Distrimed shpk me një vlerë prej 681 milionë lekë. Kjo kompani ka lidhur kontratat më të shumta me QSUT-në ku nga 126 kontrata në total 34 prej tyre janë me këtë spital.

Ndërsa në vendin e pestë renditet Rejsi Farma shpk me vlerë kontrate mbi 542 milionë. Kjo kompani ka lidhur në total 265 kontrata prej të cilave 44 i ka me QSUT-në dhe 30 me Ministrinë e Shëndetësisë.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.