Tenderë në tavolinë për rindërtimin dhe Covid-19 – APP: U prokuruan 4.3 miliard lekë me negocim, shpenzimet publike u rritën me 8.2% 

Autoritetet shtetërore kanë preferuar procedurat tenderuese në tavolinë për prokurimet e kryera në kuadër të procesit të rindërtimit pas tërmetit të 26 nëntorit, si dhe për përballimin e situatës së krijuar nga COVID-19. Të dhënat zyrtare nga Agjencia e Prokurimit Publik tregojnë se për përballimin e këtyre emergjencave në total janë realizuar 191 tenderë me negocim, pa shpallje paraprake ndërkohë që shuma e tenderuar arrin në mbi 4.3 mld lekë, ku 2.14 mld lekë janë shpenzuar për tenderimet e kryera për COVID-19 dhe 2.17 mld lekë për procesin e rindërtimit.

Tenderët me negocim, pa shpallje paraprake njihen si procedurat më pak konkurruese, ndërkohë që në total gjatë vitit 2020 kjo procedurë prokurimi është përdorur 416 herë nga institucionet publike për punë, mallra e shërbime. Sipas APP-së, pa COVID-19 dhe rindërtimin, kjo lloj procedure është përdorur 151 herë nga autoritetet kontraktore, ndërkohë që krahasuar me numrin total tё procedurave tё pёrfundura me fitues, procedurat me negocim pa shpallje paraprake të njoftimit të kontratës përbëjnë 8.3% tё tyre.

Sipas të njëtave të dhëna, fondi limit i publikuar pёr këtë lloj procedure, që arrin në 6.26 mld lekë është shumë më i ulët, krahasuar me fondin limit total të procedurave të pёrfunduara me fitues, duke zёnё vetёm 3.8% tё fondit total tё publikuar. Ndërkaq, nga përpunimi i të dhënave në Sistemin e Prokurimit Elektronik, si dhe bazuar në të dhënat paraprake tё siguruara nga Ministria e Financave dhe Ekonomisë mbi Produktin e Brendshëm Bruto, rezulton se, për vitin 2020 fondi total limit i prokuruar zë 14.7% të PBB-së, duke shënuar një rritje të konsiderueshme tё raportit tё fondit total limit dhe PBB krahasuar me vitin 2019 kur ky raport ishte 6.5%. Sipas Agjencisë së Prokurimit Publik, rritja e shpenzimeve publike lidhet drejtpёrdrejt me nevojat e rritura tё autoriteteve kontraktore nё kuadёr tё procesit tё rindёrtimit dhe pandemisё COVID-19.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.