Tenderët, institucionet shkelin rregullat – APP: Skualifikoni nga gara shoqëritë ofertuese që kanë të njëjtin administrator
Agjencia e Prokurimit Publik iu kërkon institucioneve shtetërore të zbatojnë detyrimet ligjore në drejtim të pjesëmarrjes në garë të kompanive me të njëjtin administrator. Kërkesa e APP-së bazohet në problematikat e parashtruara nga operatorë ekonomikë e për këtë arsye sjell në vëmendje se gjatë procesit të vlerësimit në procedurat tenderuese pjesëmarrja e dy shoqërive me të njëjtin administrator në të njëjtën procedurë prokurimi, përbën shkak për skualifikimin e tyre nga procedura e prokurimi.
Më konkretisht, vendimi i qeverisë që përcakton rregullat e prokurimit publik saktëson se asnjë ofertues nuk mund të marrë pjesë në ofertën e dikujt tjetër për të njëjtën procedurë prokurimi. “Pjesëmarrja nga një ofertues në më shumë se një ofertë, tek e tek ose me një ofertues tjetër, do të rezultojë në përjashtimin nga procesi të të gjitha ofertave, në të cilat është përfshirë ofertuesi”,-thuhet ndër të tjera në vendim.
Ndërkaq, Agjencia e Prokurimit Publik sjell në vëmendje se ky parashikim ligjor përfshin të gjitha llojet e procedurave tenderuese, përfshirë prokurimet me vlerë të vogël. Sipas APP-së gjatë procesit të vlerësimit të ofertave në procedurat e prokurimit me vlerë të vogël, nëse në momentin e verifikimit të objektit të veprimtarisë sipas ekstraktit të regjistrimit në Qendrën Kombëtare te Biznesit, autoritetet kontraktore vërejnë se kanë ofertuar 2 shoqëri me të njëjtin administrator duhet t’i skualifikojnë ato për ndërhyrje në ofertë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.