Tenderi i ujitjes, mbi 10 arrestime në Lushnje – Në pranga Fatos Tushe, Rama: Asnjë mbrojtje nga PS. Yuri Kim: Zyrtarët të mendojnë pasojat

Mbi dhjetë të arrestuar mes të cilëve Kreu I Bashkisë së Lushnjës, zyrtarë të kësaj njësie e biznesmenë. Është ky bilanci I deritanishëm I një tjetër operacioni të SPAK që ka sjellë arrestime massive. Bëhet me dije se hetimi ka nisur prej disa muajsh dhe ka pasur në qendër një tender prej rreth 2 milionë eurosh për rehabilitimin e kanaleve ujitës në këtë zonë.

Kreu I Bashkisë Lushnjë Fatos Tushe është arrestuar në zyrën e tij fare pak pasi kishte zhvilluar një mbledhje me vartësit. Mes të arrestuarve të tjerë rezultojnë Gazment Cela, zv. drejtori i Ndërmarrjes së Pasurive Publike, Xhemal Hasko, përgjegjësi i ujit në bashkinë Lushnje, Blerta Turuku; Ani Simoni; Andri Mushaj; Margarita Gjermeni; Bujar Murati; Ibrahim Lami. Dyshohet se personi që ka vënë në lëvizje gjithë mekanizmin është Flamur Peqini, ish Kreu i Inspektoriatit Vendor të Ndërtimit.

Menjëherë pas përhapjes së lajmit për arrestimin e Tushes ka reaguar Kryeministri Edi Rama, sipas të cilit askush që gjendet nën akuza për korrupsion nuk do gjejë strehë në Partinë Socialiste.

“Kryetari i Bashkisë së Lushnjës dhe cilido tjetër i akuzuar nga drejtësia në këtë rast apo në çdo rast, nuk do të ketë asnjë mbrojtje nga Partia Socialiste e duhet të përgjigjen vetë para drejtësisë, me avokatët e tyre e me gojën e tyre! PS u shërben zgjedhësve jo të zgjedhurve.

Çdo zgjedhës duhet ta dijë se besnikëria jonë ndaj tij nuk varet nga asnjë individ, po është flamur beteje i PS për ta bërë Shqipërinë të ardhmen tonë dhe çdo i zgjedhur nuk duhet ta harrojë se flamuri i PS s’mund të bëhet mbulesa e askujt, për asnjë interes apo faj vetjak”, shkruan Rama në Twitter.

Nuk ka munguar as reagimi i Ambasadoores Amerikane Yuri Kim, e cila ka bërë thirrje që zyrtarët duhet të mendohen mirë për pasojat përpara se të përfshihen në akte korruptive.

“Nëse jeni të përfshirë në korrupsion – pa marrë parasysh sa të fuqishëm mendoni se jeni – tani është koha të konsideroni ndikimin që veprimet tuaja do të kenë në familjen dhe vendin tuaj. Tani është koha të shqyrtojmë nëse ia vlen të shkosh në burg. Tani është koha për të ndaluar. Askush nuk është mbi ligjin”, shkruan Kim në rrjetet sociale.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.