Tensionet mes Rusisë dhe BE pas burgosjes së Navalny, ministri gjerman: “Nuk duhet të ndikojë tek projekti i tubacionit të gazit”
Ministri i ekonomisë në Gjermani thotë se projektet e biznesit duhet të ndahen nga reagimet ndaj shkeljeve të të drejtave të njeriut. Gjermania është përballur me kritika të vazhdueshme për projektin e saj të tubacionit rus.
Ministri i Ekonomisë, Peter Altmaier tha se reagimi i Gjermanisë ndaj helmimit të figurës ruse të opozitës Alexei Navalny nuk duhet të lidhet me ndërtimin e tubacionit të gazit Nord Stream 2, në një intervistë me një të përditshme gjermane.
“Marrëdhëniet e biznesit dhe projektet e biznesit që kanë ekzistuar për dekada janë një gjë dhe shkeljet serioze të të drejtave të njeriut dhe reagimet tona ndaj tyre janë një tjetër,” i tha Altmaier gazetës Bild am Sonntag.
Deklarata e Altmaier pason një vërejtje të premten nga kancelarja gjermane Angela Merkel, e cila gjithashtu paralajmëroi kundër lidhjes së dy çështjeve. Kjo vjen pasi Rusia dëboi diplomatët e tjerë gjermanë dhe evropianë, duke i akuzuar ata për pjesëmarrje në protesta ‘të paligjshme’ kundër burgut të Navalny.
Altmaier i tha gazetës se kontraktorët duhet të ecin përpara me ndërtimin e tubacionit të diskutueshëm.
Nord Stream 2 do të dyfishojë dërgesat e gazit natyror rus në Gjermani. SH.B.A. dhe disa vende të BE të tilla si Polonia e kundërshtojnë projektin, duke deklaruar se ai do të rrisë varësinë e Gjermanisë nga Rusia për gaz.
Projekti i diskutueshëm është gati të përfundojë.
Presidenti i SHBA Joe Biden e ka përshkruar tubacionin si një “marrëveshje të keqe për Evropën” dhe administrata e tij pritet të vendosë sanksione të mëtejshme mbi kompanitë që operojnë tubacionin.(Deutsche Welle)
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.