Tentohet vjedhja e kabëllit të ndriçimit në autostradën Tiranë-Durrës! ARRSH: U raportua nga kontraktori, policia kapi autorët

Autoriteti Rrugor Shqiptar njofton se në autostradën Tiranë – Durrës, nga rrethrrotullimi “Shqiponja” e në vijim në kilometrin e parë, është raportuar nga ana e kontraktorit për mirëmbajtjen e këtij aksi, tentativa për vjedhje e kabëllit të linjës së ndriçimit në një gjatësi prej 820 metrash.

Persona të paidentifikuar kishin gërmuar dhe thyer betonet duke dëmtuar në shumë vende kabëllin e ndriçimit në këtë gjatësi të rrugës dhe duke marrë një sasi.

“Falë punës së Policisë së Tiranës dhe bashkëpunimit, u bë e mundur identifikimi dhe kapja e autorëve, të cilët gjatë paradites së djeshme tentuan të vidhnin kabëllin e energjisë elektrike për shtyllat e ndriçimit dhe për këtë do të dënohen sipas ligjit në fuqi” njofton ARRSH.

Në fund të njoftimit, ARRSH paralajmëron që të bëhet kujdes pasi “askush nuk ka të drejtë të cënojë, apo vjedhë pronën publike!” dhe se “çdo shtetas që kryen vepra të tilla do të penalizohet me forcën e ligjit!”

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.