Tentoi të transferonte para jashtë Shqipërisë – Ish zyrtarit i bllokohen 1.5 milionë euro
Drejtoria për Hetimin e Krimeve Ekonomike e Financiare, në bashkëpunim me Seksionin për Hetimin e Pastrimit të Parave, në Tiranë, finalizoi operacionin policor të koduar “Investimi”, për sekuestrimin e 1.5 milionë në llogarinë bankare, të një shtetasi, ish – punonjës i administratës shtetërore i cili në vitet 2006 – 2011 ka mbajtur funksione zyrtare në Agjencinë e Legalizimit, Urbanizimit dhe Integrimit të Zonave Urbane, bën me dije Policia e Shtetit.
Sipas njoftimit, ky shtetas dyshohet se ka konsumuar veprën penale “Pastrimi i produkteve të veprës penale”, duke kryer disa investime në pasuritë e paluajtshme. Dhe se nëpërmjet një banke private, shtetasi i lartpërmendur ka tentuar transferimin e 1 milionë eurove jashtë vendit, me justifikimin për investime financiare, ndërkohë 500 mijë euro të tjera i ka vendosur në depozitë me afat. Policia njofton gjithashtu se për efekte hetimi nuk mund të jepen të dhëna të tjera të cilat do të mund të publikohen në një moment të dytë.
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.