Tentojnë të vjedhin një vilë – Policia arreston në flagrancë 2 autorët në Lezhë

Policia ka arrestuar në flagrancë dy autorë të dyshuar për vjedhjen e një banese vilë në Ishull Shëngjin, në Lezhë. Shtetasit me iniciale B.M dhe E.M, të dy banues në Kurbin janë kapur në momentin kur po nxirrnin materialet për t’i transportuar.

Policia ka sekuestruar në cilësinë e provës materiale edhe pajisjet shtëpiake që po tentonin të vidhnin, si: frigorifer, tavolinë, karrike, lavatriçe, disa vegla pune dhe pajisje të tjera shtëpiake, etj. Sipas policisë, të arrestuarit dokumentohen me prova ligjore si autorë të dyshuar të disa vjedhjeve të tjera të ndodhura më herët:

“Më datë 27.09.2018, dyshohet të kenë vjedhur me thyerje marketin në pronësi të shtetasit E.L., në Shënkoll – Lezhë.

Më datë 09.10.2018, dyshohet të kenë vjedhur dyqanin e elektroshtëpiakeve në pronësi të shtetasit M.Xh. në Lezhë.”

Materialet procedurale në ngarkim të tyre , i kaluan Prokurorisë pranë Gjykatës Shkallës Parë Lezhë për veprën penale ” Vjedhje” kryer në bashkëpunim’ parashikuar nga neni 134/2 i Kodit Penal.

Gjithashtu policia bën me dije se kontrolle të befasishme do vazhdojnë edhe në ditët në vijim me qëllim ruajtjen e rendit dhe sigurisë publike.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.