“Tërhiqet” çmimi i arit. Yield-et e Thesarit në SHBA prekin nivelin më të lartë në 1 vit
Ari është tërhequr në sesionin tregtar të ditës së Enjte, ndërkohë që interesat e titujve të thesarit në SHBA, u rritën në nivelin më të lartë në 1 vit, duke zbehur “shkëlqimin” e arit. Norma spot e arit ra me 0.6% në 1,792,8 dollarë për onz në nisje të tregtisë. Analistët thonë se rritja e yieldeve afat-gjata përbëjnë faktorin kryesor negativ tek metalet e çmuara. Interesat benchmark të titujve të Thesarit, arritën pranë majës 1-vjeçare në sesionin e kaluar, duke rritur koston oportune të mbajtjes së arit, që nuk paguan interes.
Megjithatë, vëmendja e investitorëve qëndron tek paketa prej 1.9 trilionë dollarë e koronavirusit në SHBA, që pritet të kalojë së shpejti. Kjo me shumë mundësi do të sjellë rimëkëmbje në afat-shkurtër për metalin e çmuar. Kryetari i Rezervës Federale, Jerome Powell, tha këtë javë se politikat monetare do qëndrojnë të pandryshuara deri sa ekonomia të rimëkëmbet dhe tregu i punës të përmirësohet. Kjo solli rënien e lehtë të dollarit dhe rritjen e metalit të çmuar. Duke reflektuar humorin e investitorëve, zotërimet në fondin e listuar në bursë më të madh në botë që ndjek çmimin e arit, SPDR Gold Trust, ranë në nivelin më të ulët që prej Majit 2020 ditën e Mërkurë.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.