Tërhiqet “presidenti i të pasurve” – Franca mund të ndryshojë pozitën ndaj taksës së pasurisë
Franca mund të ndryshojë qëndrimin ndaj taksës së pasurisë, sipas zëdhënësit të Qeverisë, Benjamin Griveaux, ndërkohë që janë shtuar protestat kundër politikave të presidentit Emmanuel Macron. Qeveria ndryshoi disa aspekte të taksës së pasurisë, e njohur në Francë si ISF, duke e ngushtuar vetëm në marrëveshjet fitimprurëse të pronave dhe aktivet të paluajtshme. Megjithatë, kjo lëvizje nxiti kritika se Macron është “Presidenti i të Pasurve”, pasi do të lehtësonte barrën tatimore për shumë qytetarë të pasur të vendit. Këtë javë, Griveaux tha se Qeveria mund të rikonsiderojë këto propozime, nëse gjykon se ishte lëvizje e gabuar.
“’Nëse masa që kemi marrë, që po kushton para publike dhe ne jemi të bindur që do funksionojë, rezulton jo efektive, atëherë ne do ta ndryshojmë. Moratoriumi është një fjalë e ndërlikuar, kështu që pezulluam rritjen e taksës për karburantin, që të kemi kohë për diskutime”, tha Griveaux.
Më herët gjatë javës, Kryeministri francez, Edouard Philippe, vendosi të pezullojë planin e rritjes së taksës për karburantin me të paktën 6 muaj, në kundërpërgjigje të protestave të dhunshme. Kjo shënoi kthesën më të madhe të administratës së Macron gjatë 18 muajve në detyrë. Protestuesit kanë vazhduar të bllokojnë rrugët duke thënë se këto masa janë “një pikë në oqean” dhe se nuk do të përmirësojnë shumë fuqinë blerëse të tyre.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.