Tërmetet/ Rritet kërkesa për toka dhe kate të ulëta, Sila: Ndryshon tregu i pronave, Durrësi në “shok”
Dridhjet e vazhdueshme të tokës kanë riorientuar tregun e pasurive të paluajtshme. Në një intervistë për SCAN, eksperti Lefter Sila shprehet se ata që kanë mundësi financiare kanë rritur kërkesën për vila, por risi është edhe fakti se ka një kërkesë të shtuar për toka.
“Ka ndryshuar edhe forma e kërkesës, sepse qytetarët që kanë mundësi financiare të larta kërkojnë të blejnë vila, kryesisht në zonën e TEG-ut, por të blejnë edhe toka që të rindërtojnë një shtëpi, për të zëvendësuar atë që është dëmtuar. Për toka është rritur kërkesa për të blerë, por prapë paraqitet vështirësia e lejes së ndërtimit, pasi duhet gjetur një zonë e studiuar dhe kjo është mjaft e vështirë në disa raste.”
Ndërsa qytetarët me buxhete mesatare, kërkojnë më së shumti pallate me pak kate dhe apartamente në katet e ulëta. Sipas tij, individët janë bërë më të ndërgjegjshëm dhe kërkojnë më shumë siguri.
”Ka edhe një pjesë qytetarësh të cilët nuk kanë të ardhura të larta, por mesatare. Ata kanë ndryshuar gjithashtu kërkimet në tregun e pronave të paluajtshme. Kryesisht kërkojnë tashmë në pallate që të jenë më të ulëta, pallate nga 6-7 kate. Kërkojnë në kate të ulëta pasi mendojnë se janë më të sigurtë, nga dridhjet e tërmetit. Tashmë janë më të vëmendshëm në atë që kërkojnë, duke shikuar gjithnjë për kushtet e sigurisë që ofron ndërtesa.”
Sa i përket qyteti të Durrësit, tregu i shitblerjes së pronave vijon të jetë në “shok” pas tërmetit të 26 Nëntorit.
”Në qytetin e Durrësit kemi një pasiguri shumë më të madhe, pasi aty goditja e tërmetit ishte më e fortë. Vëmë re se kërkesa për pasuri është ulur në mënyrë të ndjeshme. Në këtë qytet kemi rritje të mëdha të qirave dhe çmimeve të apartamenteve, sidomos të atyre të vogla.”
Tërmeti i vitit që lame pas, i dha një goditje tregut të pronave, pasi shkaktoi dëme masive si dhe la mijëra të pastrehë.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.