Tërmeti 5-fishon dëmshpërblimet e sigurimeve – Kompanitë paguan 27 milionë dollarë në 2020, renditja sipas vlerës së dëmeve

Tërmeti i 26 nëntorit 2019 ka ndikuar ndjeshëm në treguesit e tregut të sigurimeve për vitin që sapo lamë pas. Dy efektet më të dukshëm janë rritja e numrit të shqiptarëve që kanë vrapuar të sigurojnë pasuritë nga katastrofat natyrore dhe volumi i dëmshpërblimeve të paguara nga kompanitë për të mbuluar dëmet e klientëve të tyre. Nga analiza e treguesve zyrtarë të tregut të sigurimeve për periudhën janar nëntor 2020 në portofolin sigurimi nga Zjarri dhe Forcat e Natyrës, gjatë periudhës janar-nëntor 2020, vihet re një rritje prej 9.67% e vëllimit të primeve të shkruara bruto të këtij portofoli dhe një rritje me 3.25% e numrit të kontratave të sigurimit, krahasuar me periudhën janar-nëntor 2019.

Në portofolet e Pronës, Përgjegjësive, Garancive të cilat gjatë periudhës janar-nëntor 2020 siguruan mbi 2,533 milionë lekë të ardhura në total, vendin e parë e zunë Zjarri dhe Dëmtime të Tjera në Pronë me rreth 60.21%, të pasuara nga sigurimi i Përgjegjësisë së Përgjithshme me 30.68% të totalit.

Ndërkohë që për sa i përket dëmshpërblimeve në zërin e sigurimit të pronave nga katastrofat janë pesëfishuar. Sipas të dhënave zyrtare të publikuara nga Autoriteti i Mbikëqyrjes Financiare, volume i dëmeve të paguara nga kompanitë e sigurimeve për periudhën janar nëntor janë pesëfishuar. Nga 4.1 milionë dollar në vitin 2019, volume total i dëmshpërblimeve që kanë paguar kompanitë për sigurimin nga zjarri e forcat e natyrës ka kërcyer në 27 milionë dollarë për nëntëmujorin e vitit 2020.

Ka qenë kompania Albsig ajo që është përballuar me kostot më të mëdha të dëmshpërblimeve. Kjo kompani ka paguar gjatë vitit që sapo lamë pas më shumë se 1 miliardë lekë, afërisht 10 milionë dollar në portofolin Sigurimi nga Zjarri, Forcat e Natyrës dhe Dëmtimet e tjera në Pronë. Bëhet fjalë për një rritje me rreth 556% krahasuar me periudhën janar nëntor të një viti më parë, kur volume i dëmeve të paguara bruto për këtë kompani ishte afërisht 1.5 milionë dollar. Në vend të dytë për nga volumi i dëmeve të paguara bruto në këtë portofol renditet  Sigal Uniqa Group Austria, me një vlerë totale prej 714 milionë lekësh, afërisht 7 milionë dollar. Në vend të tretë renditet  Sigma Interalbanian Vienna Insurance Group, e cila ka njohur një rritje prej 225% të volumit të dëmeve për vitin 2020, që ka kapur vlerën e rreh 3.3 milionë dollar për periudhën janar nëntor të vitit 2020. Rritje të ndjeshëm të këtij zëri ka shënuar edhe kompania  Atlantik, e  cila ka paguar rreth 2 milionë dollar në vitin 2020, nga rreth 25 mijë dollarë në janar nëntor të vitit 2018. Më tej në listë renditen kompanitë Ansig, Intersig Vienna Insurance Group dhe Eurosig me përkatësisht 1.9, 1.7 dhe 1.6 milionë dollar, të gjitha me rritje të fortë krahasuar me 2019. Lista mbyllet nga INSIG, e cila për janar nëntor 2020 ka paguar rreth 650 mijë dollar dëme, me rritje prej 138% krahasuar me të njëjtën periudhën të vitit 2019.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.