Tërmeti, koronavirusi, amnistia fiskale- Çfarë pasojash parashikon misioni i FMN-së për Shqipërinë në 2020? Kërkohet kujdes dhe premtohet ndihmë
Një ekip i Fondit Monetar Ndërkombëtar ka përmbyllur një mision në Shqipëri në datat 9-13 mars 2020. Ky mision u realizua si rrjedhojë e tërmetit të 26 nëntorit 2019, për faktin se ishte realizuar njëherë por pasojat e rënda të tërmetit detyruan misionin t’i rikthehet sërish Shqipërisë.
Ekipi i drejtuar nga Jan Kees Martijn në fund të misionit ka mbajtur edhe një deklaratë ku parashikon se tërmeti dhe sidomos pasojat e COVID-19 pritet të sjellin pasoja për ekonominë shqiptare.
“Parashikimet afatgjata për ekonominë shqiptare ndryshuan gjatë tre muajve të fundit. Tërmeti që goditi Shqipërinë në 26 nëntor 2019 parashikohet të dobësojë rritjen ekonomike në 2020.
Aktiviteti ekonomik, veçanërisht turizmi do të ketë ndikim negativ, përjashtuar ndikimin pozitiv që pritet nga program i rindërtimit. Për më tepër, shpërthimi i fundit global i koronavirusit (COVID-19) pritet të ngadalësojë rritjen ekonomike më tej në vitin 2020, dhe kjo tronditje gjithashtu do të godasë turizmin. Shkalla e ngadalësimit është shumë e pasigurt në këtë moment” thuhet në deklaratën e misionit.
Pas tërmetit autoritetet shqiptare, sipas misionit, me të drejtë vendosën të prioritizojnë shpenzimet burxhetore në kapërcimin e pasojave dhe në projektin e rindërtimit, duke lejuar një rritje të moderuar të deficitit fiscal.
“Do të jetë e rëndësishme të siguroheni që projektet e rindërtimit të menaxhohen në mënyrë transparente, në përputhje me praktikat më të mira ndërkombëtare, dhe të vendosni përparësi ndaj më të prekurve.
Do të jenë të nevojshme edhe politikat për të mbrojtur njerëzit gjatë shpërthimit të COVID-19 duke siguruar që sektori shëndetësor të ketë burime të mjaftueshme dhe duke mbështetur më të prekurit. Politika monetare duhet të mbetet fuqishëm akomoduese, për të mbështetur rritjen ekonomike. Ne jemi të gatshëm të vazhdojmë dialogun me autoritetet për masat për të ndihmuar në kufizimin e ndikimit ekonomik të virusit” shkruhet në tej në deklaratën që sjell SCAN.
Misioni i kërkon qeverisë shqiptare që pasi të kenë kaluar tronditjet e tanishme negative, autoritetet duhet të lejojnë një stimulim më të madh fiskal për të adresuar goditjet e mundshme në të ardhmen. “Prandaj, masat për të ulur borxhin publik dhe për të përmirësuar rreziqet fiskale të propozuara në Deklaratën tonë përmbyllëse të 26 nëntorit 2019 mbeten të një rëndësie kritike” vijon më tej deklarata.
Në deklaratë, misioni i FMN-së kërkon që të bëhet kujdes me aministinë fiskale të njofuar nga qeveria, për të cilën evidentohet se ende nuk ka një draft zyrtar.
“Një program i mundshëm i zbulimit të pasurive, siç u njoftua kohët e fundit nga autoritetet, që synon ringjalljen e ekonomisë do të duhet të zbatohet me shumë kujdes. Ndërsa deri më tani nuk është lëshuar ndonjë propozim specifik, përvoja në vendet e tjera ka treguar që programe të tilla minojnë pajtueshmërinë e taksave nëse përdoruesit marrin një trajtim më të favorshëm tatimor sesa ata që ishin në përputhje nga fillimi. Për më tepër, sistemet efektive duhet së pari të krijohen për të zbuluar evazionin dhe për të parandaluar mundësitë për pastrim parash dhe korrupsion” përfundon deklarata.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.