Tërmeti në sigurime-Në dhjetor u paguan rreth 900 dëme me vlerë 2.8 milionë euro

Statistikat e muajit dhjetor kanë dhënë një tablo zyrtare në shifrat të efekteve të tërmetit të vitit të kaluar në tregun e sigurimeve.

Mbështetur në të dhënat e Autoritetit të Mbikëqyrjes Financiare, dëmet e paguara gjatë dhjetorit në klasën e sigurimit ndaj forcave të natyrës ishin 341 milionë lekë ose rreth 2.8 milionë euro. Numri total i dëmeve të paguara për muajin dhjetor ishte rreth 900.

Megjithatë, besohet se këto shifra përfaqësojnë vetëm një pjesë të vogël të dëmeve të shkaktuara nga ngjarja. Efekti më i madh është ai që reflektohet në shumën e dëmeve pezull. Këtu përfshihen dëmet ne proces vlerësimi, dëme të miratuara të papaguar dhe ato proces gjyqësor.

Vetëm gjatë dhjetorit, vlera e dëmeve pezull në tregun e sigurimit të jo-jetës u rrit me dy miliardë lekë ose rreth 16.4 milionë euro. Mendohet se ndikimin kryesor në kërcim të dëmeve pezull e ka dhënë pikërisht ngjarja e 26 nëntorit.

Dëmet pezull të kompanive të sigurimit të jo-jetës arritën vlerën e 7.5 miliardë lekëve në fund të vitit të kaluar, me një rritje prej 62% krahasuar me një vit më parë. Numri total i dëmeve pezull arriti në pothuajse 12,500, me rreth tre mijë dëme të reja të shtuara në muajin dhjetor. Në bilancin vjetor, tregu i sigurimeve nuk vuajti pasoja të mëdha nga tërmeti.

Dëmet totale madje pësuan rënie me rreth 3% krahasuar me vitin 2018. Duket se efektet për tregun do të shtrihen kryesisht gjatë vitit 2020. Nga ana tjetër, duket se tërmeti ka sjellë një rritje të interesit të qytetarëve për të siguruar pronat e tyre nga fatkeqësitë natyrore.

Sipas AMF-së, për dhjetorin primet e sigurimit u rritën me 285 milionë lekë, ndërsa numri i kontratave u rrit me rreth 4,300.

Këto shifra ishin ndjeshëm më të larta se mesatarja vjetore e tregut. Gjithsesi, në total primet e sigurimit nga forcat e natyrës e mbyllën vitin në rënie me 17% krahasuar me vitin e kaluar.

Në total, shqiptarët shpenzuan rreth 11.3 milionë euro ose më pak se katër euro për frymë për të siguruar pronat e tyre.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.