Tërmeti nuk zhbën optimizmin: 70% e shqiptarëve, optimistë për 2020-ën, të dytët në botë, por ndër më të palumturit
Pavarësisht serisë së ngjarjeve aspak pozitive që kanë ndodhur gjatë vitit të kaluar, të cilat kulmuan me tërmetin shkatërrues të 26 Nëntorit, shqiptarët vijojnë të jenë ndër popujt më optimistë në botë.
Të anketuar nga gjigandi botëror “Gallup”, në kuadër të anketës së fundvitit, 70% e shqiptarëve deklarojnë se presin që 2020 të jetë më e mirë se 2019-ta. Kjo përqindje është vetëm 1 pikë poshtë asaj të vitit të kaluar, kur 71% e shqiptarëve shpreheshin me optimizëm për vitin e ri. Por, pavarësisht kësaj rënie të lehtë, vijojmë të jemi të dytët si më optimistët në botë, pas Peru-së.
Me anketën e këtij viti edhe numri i pesimistëve ka rënë lehtë. Janë vetëm 9% ata që besojnë se 2020 do të jetë më e keqe se 2019-a, ndërkohë që një vit më parë ishin 10%. Për shqiptarët e Kosovës, norma e optimizmit është disi më e vogël, në 56%, por sërish ndër më të lartat në botë. Ky optimizëm i lartë vjen pavarësisht faktit se shqiptarët janë ndër popujt më të palumtur në botë.
Në këtë përfundim arrin e njëjta anketë e Gallup e fund vitit, e cila veç indeksit të shpresës përmban edhe atë të lumturisë. Janë vetëm 6% e shqiptarëve që shprheen shumë të lumtur me jetën e tyre, ndërsa 46% shprehen të lumtur. Të palumturit janë rreth 15%.
Indeksi i përgjithshëm në 37 pikë bën që shqiptarët e Shqipërisë të jenë ndër shoqëritë më të palumtura në botë. Janë vetëm 7 shoqëritë e tjera globale më të palumtura se ne.
Pra, ashtu si një vit më parë, rezultati mbetet paradoksal; shqiptarët janë ndër popujt më të palumtur në botë, e që çuditërisht, kjo palumturi, sërish i bën të jenë ndër më optimistët në botë.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.