Tërmeti, si aplikohet për rindërtim/ Formula, sa metra do të përfitojë çdo familje dhe si do të ruhet pronësia mbi truallin
Është publikuar tashmë në Fletoren Zyrtare vendimi i Këshillit të Ministrave ku përcaktohen kategoritë e familjeve të dëmtuara nga tërmeti i 26 nëntorit që do mund të përfitojnë nga programet e rindërtimit, si dhe procedurat e aplikimit deri te marrja në pronësi e shtëpive të reja. Aplikimi do të bëhet në dy faza dhe prioritet do të kenë familjet që kanë humbur familjarët, familjet një prindërore që kanë në ngarkim fëmijë; familjet që kanë në përbërje personat me aftësi të kufizuara; të moshuarit, që kanë mbushur moshën e pensionit; familjet në skemën e ndihmës ekonomike; dhe të rënët në krye të detyrës.
Aplikimet do të bëhen pranë njësive vendore dhe ato duhet të përmbajnë të dhënat e familjeve si dhe aktin e konstatimit/aktekspertizën e thelluar, të lëshuar nga çdo person fizik ose juridik që ka tagrin ligjor ta bëjë këtë.
Familjet, që kanë humbur banesat si pasojë e shembjeve të ndërtesave (pallateve), përfitojnë nga programi i zhvillimit të zonave të reja ose programi i rindërtimit të godinave në të njëjtin truall ose programi i fondit të banesave. Familjet në qytetet, që kanë humbur shtëpitë individuale si pasojë e shembjes, përfitojnë nga programi i zhvillimit të zonave të reja ose programi i granteve të rindërtimit ose programi i fondit të banesave. a) Sipërfaqja e banesës që i kalohet në pronësi përfituesve, në ndërtesat e realizuara në kuadër të programit të zhvillimit të zonave të reja ose në banesat e programit të fondit të banesave, llogaritet sipas në bazë të numrit të anëtarëve: familjet me 2 anëtarë do përfitojnë apartamente 1 plus 1 me sipërfaqe deri 60 metra katrorë; me deri katër anëtarë 2 plus 1 deri 80 metra katrorë; dhe më shumë se 5 anëtarë do përfitojnë apartamente 3 plus 1 deri 100 metra katrorë. Përfituesit ruajnë të drejtën e pronësisë për truallin e shtëpisë individuale, përveç rastit kur për nevoja të zhvillimit të programeve të rindërtimit prona truall shpronësohet ose kompensohet sipas parashikimeve të aktit normativ nr. 9, datë 16.12.2019, të Këshillit të Ministrave, “Për përballimin e pasojave të fatkeqësisë natyrore”.
- b) Kur zona e re për zhvillim do të realizohet me shtëpi banimi individuale, familjet përfitojnë në pronësi shtëpi individuale banimi me sipërfaqe ndërtimi që llogariten sipas formulës: deri 2 anëtarë deri 70 metra katrorë, deri katër anëtarë përfitojnë sipërfaqe deri 80 metra katrorë; dhe me 5 e më shumë anëtare jo më pak se 90 metra katrorë, Në këto raste, përfituesit ruajnë të drejtën e pronësisë për sipërfaqen e truallit që rezulton si diferencë e truallit të shtëpisë individuale të shembur me truallin e shtëpisë individuale banimi të re që përfitojnë, nëse ka, përveç rastit kur, për nevoja të zhvillimit të programeve të rindërtimit, kjo sipërfaqe trualli shpronësohet ose kompensohet.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.