Tesla bie me rreth 9% në bursë – Ndjekësit e Musk i thonë “po” sondazhit për shitjen e 10% të aksioneve

Aksionet e Tesla, të listuara në bursën e Frankfurtit, ranë me rreth 9% në nisje të tregtisë ditën e Hënë, pasi investitorët u përgatitën për propozimin e Elon Musk, për të shitur 10% të aksioneve të tij, duke ndjekur rezultatin e një sondazhi në Twitter.  Musk, njeriu më i pasur në botë, shkroi në Twitter gjatë fundjavës se do të shesë 10% të aksioneve të tij tek Tesla, nëse ndjekësit në Twitter e miratojnë propozimin.

Sondazhi që pyeste nëse Musk duhet të shesë aksionet, mori mbi 3.5 milionë vota, apo 57.9%.  Aksionet e Tesla të listuara në Frankfurt e nisën tregtinë në rënie me 7.9% në 980 euro. Aksionet e lisutara në SHBA, janë rritur me 73.2% deri më tani për vitin, krahasuar me 23.9% rritje në indeksin Nasdaq.  Musk kishte thënë më parë se duhej të ushtronte një numër të madh të kontratave options në aksione në 3 muajt e ardhshëm, ç’ka do të krijojë një faturë të madhe tatimore. Shitja e aksioneve tek Tesla, mund të lirojë fonde që të paguajë taksat.

“Unë isha i përgatitur për të pranuar secilin rezultat”- tha Musk, pasi votimi përfundoi.  Deri më 30 Qershor, zotërimi i Musk tek Tesla, arrinte në 170.5 milionë aksione dhe shitja e 10% të tyre arrin në 21 miliardë dollarë, bazuar tek çmimi i mbylljes së tregtisë në ditën e Premte. Përfshirë kontrata options në aksione, Musk zotëron 23% tek Tesla, që është kompania me vlerën më të madhe në botë.

Sondazhi i Musk vjen pas një propozimi nga demokratët në Kongres për të taksuar aksionet e miliarderëve dhe aktive të tjera të tregtueshem, për të ndihmuar axhendën e shpenzimeve sociale të presidentit Joe Biden. Tesla kaloi 1 trilionë dollarë në vlerë tregu në fund të Tetorit, duke u bërë kompania e pestë amerikane që i  bashkohet klubit ku merr pjesë Apple, Microsoft, Amazon dhe Alphabet.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.