Tesla, lider i transformimit elektrik. Musk premton bateri më të mira për makinat, me gjysmën e kostos
Ekzekutivi i Tesla, Elon Musk, prezantoi një gjeneratë të re të baterive për makinat elektrike që do të jenë më të fuqishme, me më shumë kohëzgjatje dhe me një kosto të përgjysmuar. Musk tha se bateritë e reja të mëdha cilindrike, të quajtura 4680, do të ofrojnë 5 herë më shumë energji, 6 herë më shumë fuqi dhe prodhimi në masë do të nisë pas 3 vitesh.
“Një nga gjërat që më shqetësojnë më shumë është se nuk kemi ende një makinë të përballueshme në çmim dhe këtë duhet ta bëjmë në të ardhmen. Por në mënyrë që ta bëjmë këtë, do të duhet të ulim koston e baterive dhe duhet të jemi më të mirë në manifakturë.”
Për të ulur kostot, Musk tha se Tesla planifikon të riciklojë bateritë tek “gigafabrika” në Nevada, ndërkohë që redukton kobaltin në zero, një nga materialet më të shtrenjtë të baterive. Tesla do të prodhojë bateritë e reja në një linjë të montimit pranë fabrikës në Kaliforni, me prodhimin e planifikuar që pritet të arrijë 10 gigaëatt-orë deri në fund të vitit 2021. Tesla dhe partneri Panasonic, kanë tashmë një kapacitet të prodhimit prej rreth 35 gWh, në gigafabrikën në Nevada. Tesla synon të përshpejtojë prodhimin e baterive në vitet e ardhshme në 3 terwatt për orë në vit, apo 3,000 gigawatt në orë, thuajse 85 herë më shumë se kapaciteti i fabrikës në Nevada. Ndërkohë që procesi i transformimit drejt makinave elektrike po merr vrull, investitorët po kërkojnë prova se Tesla do vazhdojë të jetë lideri i teknologjisë. Ndërkohë që çmimet mesatare të makinave elektrike kanë rënë në vitet e fundit, për shkak të ndryshimeve në përmbajtjen e baterive, ato janë ende më të shtrenjta se makinat tradicionale dhe bateria vlerësohet në 25-35% të kostos. Ekspertët thonë se pariteti i çmimit, apo pika ku makinat elektrike të jenë të barabarta në vlerë me makinat me djegie të brendshme, do të arrihet kur pakot e baterive të kushtojnë 100 dollarë për kilovat orë. Pakot e baterisë të Tesla kushtonin 156 dollarë për kh në vitin 2019.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.