Testime të shpejta për të zbuluar kush është imunizuar nga virusi! Qeveria po studion fazën 2, atë të rihapjes graduale

Faza e dytë, ajo e rihapjes graduale të Italisë,mund të kalojë përmes një testimi masiv të popullatës për të zbuluar kush është imunizuar sepse ka pasur virusin dhe mbase edhe nuk e ka kuptuar aspak. Për momentin është vetëm një hipotezë, shkruan “Ilsole24ore” por qeveria po punon dhe pret që teknikët e komitetit shkencor mund të vlerësojnë mundësinë e testeve të gjakut, shumë prej të cilëve akoma jo fort të besueshëm. Bëhet fjalë për testime të shpejta gjaku që identifikojnë prezencën e antikorpeve ndaj virusit nëse infektimi ka ndodhur dhe ka pasur si rrjedhojë edhe imunizimin ndaj tij.

Këto testime mund të ndihmojnë për të kuptuar për shembull se sa kanë qenë personat që kanë pasur virusin në Itali, përveç rasteve të diagnostikuara. Mbi të gjitha, në fazën e rihapjes do të bëhet e rëndëisshme evidentimi i atyre që kanë kaluar infeksionin, por pa simptoma dhe me simptoma të lehta sa nuk u është bërë diagnozë. Të dhënat më pas do të shërbejnë për të kuptuar jo vetëm peshën reale të pasojave të virusit në popullatë por edhe për të shmangur gabime në të ardhmen. Komiteti shkencor që po punon mund të dalë në një konkluzion dhe vendimmarrje pikërisht në këto ditë.

Testimet e shpejta parashikohet të jenë ekonomike e kostoja e tyre mund të variojë nga 12-25 euro, por kanë një besueshmëri të ulët. Testimet që kushtojnë më shumë, rreth 70 euro janë ato të laboratorit që rezultojnë me besueshmëri 90 %. Deri më tani në Itali, janë  36 laboratorë në Itali që po kërkojnë të marrin “OK” e nisjes së procesit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.