Testimi për drejtorët! Ministria e Shëndetësisë shpall konkursin për drejtuesit e FSDKSH-së. Kriteret, dokumentet dhe procedurat e vlerësimit   

Pas shpalljes së njoftimit për drejtuesit e spitaleve të bashkive në vend, tashmë Ministria e Shëndetësisë dhe Mbrojtjes Sociale ka shpallur kriteret dhe procedurat e aplikimit për drejtuesit rajonalë të Fondit të Sigurimit të Detyrueshëm të Kujdesit Shëndetësor.

Konkretisht, përmes një njoftimi, MSHMS ka shpallur të hapur konkursin për vendet vakante pranë FSDKSH-së, për pozicionin e punës për:

Drejtor i Drejtorisë Rajonale të Fondit, Tiranë;

Drejtor i Drejtorisë Rajonale të Fondit, Berat;

Drejtor i Drejtorisë Rajonale të Fondit, Fier;

Drejtor i Drejtorisë Rajonale të Fondit, Vlorë;

Drejtor i Drejtorisë Rajonale të Fondit, Gjirokastër;

Drejtor i Drejtorisë Rajonale të Fondit, Dibër;

Drejtor i Drejtorisë Rajonale të Fondit, Kukës;

Drejtor i Drejtorisë Rajonale të Fondit, Lezhë;

Kryetar Dege Sarandë.

Kushtet dhe kriteret e konkurrimit

Kushtet që duhet të plotësojnë kandidatët:

-Të jetë shtetas shqiptar;

-Të ketë zotësi të plotë për të vepruar;

-Të zotërojë gjuhën shqipe, të shkruar dhe të folur;

-Të jetë në kushte shëndetësore qe e lejojnë të kryej detyrën përkatëse;

-Të mos jetë i dënuar me vendim të formës së prerë për kryerjen e një krimi apo për kryerjen e një kundërvajtjeje penale me dashje;

-Ndaj tij të mos jetë marrë masa disiplinore e largimit nga shërbimi civil, apo masa disiplinore për shkelje të rënda në kryerjen e detyrës;

-Të ketë mbaruar Arsimin e Lartë për Juridik, Ekonomik, Mjekësi ose Farmaci, të nivelit minimal “Master Shkencor” si dhe diploma e nivelit “Bachelor” duhet të jetë në të njëjtën fushë;

-Të jetë i komunikueshëm dhe të ketë aftësi të punës në grup;

-Të ketë njohuri të gjuhës angleze ose të një gjuhe tjetër të BE-së;

-Nota mesatare do të jetë avantazh;

-Të jetë banor i rrethit ose i qarkut përkatës;

-Të ketë përvojë pune minimumi 3 vjet.

Dokumentacioni, mënyra dhe afati i dorëzimit

Kandidatët duhet të dorëzojnë dokumentacionin si më poshtë:

-Letër interesi për pozicionin në të cilin po konkurron;

-Jetëshkrimi i plotësuar (CV);

-Formulari i vetëdeklarimit të gjendjes gjyqësore;

-Të paktën 1 referenc nga punëdhënës apo bashkëpunëtorë të mëparshëm.

-Diplomë e noterizuar(për diplomat e marra jashtë republikës së shqipërisë të përcillet njehsimi nga Ministria e Arsimit);

-Diplomë Master e noterizuar;

-Listë notash e noterizuar;

-Fotokopje të librezës së punës që vërtetojnë eksperiencën në punë;

-Fotokopje e kartës së identitetit(ID);

-Raport mjekësor për aftësi në punë;

-Adresën e saktë të vendbanimit, email dhe kontakt telefonik;

-Çdo dokumentacion tjetër që vërteton trajnimet, kualifikimet, arsimin shtesë, vlerësimet pozitive, apo të tjera të përmendura në jetëshkrim;

Dokumentacioni i kandidatëve do të dorëzohet pranë drejtorisë së Përgjithshme të Fondit të Sigurimit të Detyrueshëm të Kujdesit Shëndetësor, në Adresën Rr. “Sami Frashëri”, Nr. 8, Tiranë, ndërkohë që dorëzimi i dokumenteve duhet të bëhet brenda datës 27.10.2017. “Kujdes! Mosdorëzimi i dokumenteve të mësipërm është kusht skualifikues”.

Fushat e njohurive për testimin me shkrim

Kandidatët do të testohen me shkrim rreth njohurive mbi legjislacionin e mëposhtëm:

-Ligji Nr. 10383, datë 24.02.2011 “Për sigurimin e detyrueshëm të kujdesit shëndetësor në Republikën e Shqipërisë”, i ndryshuar;

-Ligji Nr. 44/2015 “Kodi i Procedurave Administrative i Republikës së Shqipërisë”;

-Ligji Nr. 7961, datë 12.07.1995 “Kodi i punës i Republikës së Shqipërisë”, i ndryshuar;

-Ligji Nr. 9936, datë 26.06.2008 “Për menaxhimin e sistemit buxhetor në Republikën e Shqipërisë”, i ndryshuar;

-Ligji Nr. 10296, datë 08.07.2010 “Për menaxhimin financiar dhe kontrollin”, i ndryshuar;

-Ligji Nr. 9367, datë 07.04.2005 ”Për parandalimin e konfliktit të interesave në ushtrimin e funksioneve publike” i ndryshuar;

-Ligji Nr. 9131, datë 08.09.2003 “Për rregullat e etikës në administratën publike”, i ndryshuar;

-Ligji Nr. 9106, datë 17.07.2003, “Për shërbimin spitalor në Republikën e Shqipërisë”, i ndryshuar;

-Ligji Nr. 10107, datë 30.03.2009, “Për kujdesin shëndetësor në Republikën e Shqipërisë” i ndryshuar

Shpallja e rezultateve për fazën e verifikimit paraprak

Në datën 03.11.2017 kandidatët do të njoftohen nëpërmjet postës elektronike, për informacione në lidhje me plotësimin e kritereve, fazat e testimit, datën dhe vendin ku do të zhvillohet konkurrimi.

Vlerësimi i kandidatëve:

Kandidatët që plotësojnë kushtet dhe kriteret e veçanta do ti nënshtrohen procedurave të mëtejshme të vlerësimit, nga një komision i posaçëm i ngritur për këtë qëllim, në lidhje me:

a – Vlerësimin me shkrim, deri në 30 pikë;

b – Intervistën e strukturuar me gojë, deri në 50 pikë;

Gjatë intervistës do të vlerësohen në lidhje me: Njohuritë, aftësitë, kompetencën në lidhje me pozicionet për të cilat aplikojnë; Eksperiencën e tyre të mëparshme si dhe motivimin, aspiratat dhe pritshmëritë e tyre për karrierën).

c – Jetëshkrimin, që konsiston në vlerësimin e arsimimit, të përvojës e të trajnimeve, të lidhura me fushën, deri në 20 pikë.

Shpallja e rezultateve të konkurrimit:

Të gjithë kandidatët pjesëmarrës në këtë procedurë do të njoftohen individualisht në mënyrë elektronike për rezultatet (nëpërmjet adresës së e-mail të paraqitur në dokumentacionin e aplikimit).

Osman Dedja/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.