Thaçi dekreton Hotin si kryeministër të qeverisë së re, Vetëvendosja i drejtohet Gjykatës Kushtetuese
Presidenti Hashim Thaçi ka dekretuar Avdullah Hotin e LDK-së për kryeministër të Kosovës.
Sipas dekretit të nënshkruar nga presidenti, Hoti i propozohet Kuvendit të Kosovës kandidat për kryeministër për të formuar Qeverinë e Kosovës.
“Kandidati nga pika 1 e këtij Dekreti, jo më vonë se 15 ditë pas emërimit, i paraqet Qeverisë para Kuvendit të Kosovës dhe kërkon miratimin e Kuvendit”, thuhet në dekret.
Ndërkohë, në një konferencë për media, presidenti Thaçi, ka thënë se vendimi për t’i dhënë mandatin për të udhëhequr me qeverinë LDK-së është në përputhje me Kushtetutën e Kosovës.
Ai ka thënë se LDK-ja i ka garantuar se e ka siguruar shumicën parlamentare, të mjaftueshme për të formuar Qeverinë e re. Sipas Thaçit çdo politikan në Kosovë duhet të respektojë procedurat dhe faktin se pushteti mund të fitohet dhe të humbasë.
“Sërish në përputhje të plotë me Kushtetutën e Kosovës dhe me rendin demokratik të republikës sonë, duke marrë parasysh legjitimitetin e qartë nga deputetët dhe nga zotimi i dëshmuar sot nga shumica e re parlamentare të dalë nga zgjedhjet e 6 tetorit. Prandaj të gjithë ne, si zyrtarë e politikanë duhet të respektojmë në tërësi këto procedura. Duhet të pajtohemi me faktin që pushteti fitohet e humbet në respektim të plotë të Kushtetutës dhe rendit demokratik. Askush nuk mund të pretendojë që me metoda të tjera, krejtësisht jodemokratike mund ta marrë apo mbajë apo uzurpojë pushtetin.”
Nga krahu tjetër, Lëvizja Vetëvendosje nëpërmjet kryetarit të grupit parlamentar, Rexhep Selimi ka paraqitur në Gjykatën Kushtetuese të Kosovës, siç kishte paralajmëruar kërkesën për ta shpallur të pavlefshme dekretin e presidentit. Sipas tyre, e vetmja rrugë kushtetuese pas mocionit të mosbesimit ndaj qeverisë janë zgjedhjet e reja.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.