The Guardian/ Ekonomia botërore po ecën ‘përgjumësh’ drejt një krize të re financiare
Sipas ish-guvernatorit të Bankës së Anglisë, Mervyn King, ekonomia botërore është duke ecur ‘përgjumësh’ drejt një krize të re ekonomike dhe financiare që do të sjellë pasoja shkatërruese për sistemin demokratik të tregut.
Duke dhënë një leksion në Uashington në mbledhjen vjetore të Fondit Monetar Ndërkombëtar, King tha se nuk është bërë asnjë pyetje fondamentale të ideve që çuan në krizën e një dekade më parë.
“Një tjetër krizë ekonomike dhe financiare do të ishte shkatërruese për legjitimitetin e një sistemi demokratik të tregut,” tha ai. “Duke iu përmbajtur ortodoksisë së re të politikës monetare dhe duke pretenduar se e kemi bërë sistemin bankar të sigurt, ne rrjedhimisht jemi duke shkuar ‘përgjumësh’ drejt kësaj krize.”
Ai shtoi gjithashtu se SHBA. do të vuante një ‘armagedon financiar’ nëse bankës së saj qendrore, Rezervës Federale, do t’i mungojë fuqia e nevojshme për të luftuar një episod tjetër të ngjashëm me krizën e hipotekës nënprime të viteve 2007-2010.
Ish guvernatori i Bankës tha se klima ekonomike dhe politike rrallëherë ka qenë kaq e tej mbushur sa sot, duke përmendur këtu luftën tregtare të SHBA-Kinë, trazirat në Hong Kong, problemet në vendet kyçe në zhvillim si Argjentina dhe Turqia, tensionet në rritje midis Francës dhe Gjermanisë për të ardhmen e drejtimit të euros, si dhe konflikti politik gjithnjë e më i hidhur në SHBA në një kohë kur gatishmëria e SHBA për të vepruar si polic në botë po zhduket.
King u shpreh se ekonomia botërore ka ngecur në një grackë rritjeje të ulët dhe se rimëkëmbja nga kriza e vitit 2008-09 ishte më e dobët se ajo e pas Depresionit të Madh. Modelet standarde aktualisht në përdorim janë krejtësisht të padobishme si në rritjen ekonomike ashtu edhe në përgatitjen ndaj një krize financiare në të ardhmen.
Sipas tij bota hyri dhe u largua nga kriza globale financiare me një model të shtrembëruar të kërkesës dhe prodhimit. Për të shpëtuar përgjithmonë nga një kurth me rritje të ulët përfshinte një rialokim të burimeve nga një komponent i kërkesës në tjetrin, nga një sektor në tjetrin dhe nga një firmë në tjetrën. Ai është i mendimit se është koha që Rezerva Federale dhe bankat e tjera qendrore të fillojnë bisedimet pas dyerve të mbyllura me politikanët për të bërë të njohur ligjvënësit se sa të prekshëm do të ishin në rast të një krize tjetër. “Kongresi do të përballet me një zgjedhje midis ‘armagedonit financiar’ dhe pezullimit të disa rregullave që u futën pas krizës së fundit për të kufizuar aftësinë e Fed për të dhënë hua”, u shpreh ai. (TheGuardian)
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.