“The Rock” fiton 124 milionë dollarë në një vit – Paga më e lartë ndonjëherë e një aktori

Dwayne “The Rock” Johnson bëri historinë në Hollywood në vitin 2002, kur u pagua 5.5 milionë dollarë për rolin e tij në filmin Mbreti Akrep. Kjo e vendosi atë në librin e Rekordeve Guiness për pagën më të lartë për një aktor që ka rol kryesor për herë të parë.

Tani, 16 vite më pas, The Rock po thyen një tjetër rekord. Midis Qershorit 2017 dhe Qershorit 2018, ai ka fituar 124 milionë dollarë, duke u renditur i pesti në listën e Forbes për yjet më të paguar të vitit. Sipas Forbes, kjo është paga më e lartë ndonjëherë që ka arritur një aktor.

Por The Rock e justifikon mjaft mirë këtë pagë, duke qenë se filmat e tij “Jumanji: Welcome to the Jungle” dhe “Rampage” kanë fituar së bashku mbi 1.3 miliardë dollarë në shitje biletash. Forbes shkruan se aktori merr edhe një bonus të konsiderueshëm për ndjekësit e tij në rrjetet sociale, të cilët përfshijnë 110 milionë ndjekës në Instagram dhe 12.7 milionë ndjekës në Twitter, ku të dy rrjetet përdoren për të promovuar filmat e tij.

Edhe filmi i tij i fundit, Skyscraper ka arritur të fitojë mbi 67 milionë dollarë që prej premierës më 13 Korrik.

Ndërkohë sipër The Rock këtë vit renditet aktori George Clooney në vendin e dytë, por për shkak të një kompanie tekila që ka hapur dhe jo në lidhje me aktrimin. Në krye të listës renditet boksieri Floyd Mayweather me 275 milionë dollarë për ndeshjen e tij shumë të ndjekur me Conor McGregor.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.