Thellohet bashkëpunimi në shëndetësi – Shqipëri-Kosovë, shkëmbim të mjekëve mes dy vendeve
Mjekët e Kosovës tashmë do të ofrojnë shërbim të specializuar në Shqipëri në zonat kufitare. Marrëveshja 3-vjeçareqë forcon bashkëpunimin mes dy vendeve në fushën e shëndetësisë është firmosur sot nga ministrja e Shëndetësisë, Ogerta Manastirliu dhe homologu, Uran Ismaili.
Marrëveshja parashikon shkëmbimin e mjekëve në funksion të përmirësimit të strukturave shëndetësore të dy vendeve tona. Më tej, në marrëveshje përfshihet edhe bashkëpunimi në fushën e shëndetit publik, farmaceutikës, trajnimeve të profesionistëve të shëndetit etj.
Në zbatim të kësaj marrëveshjeje, palët do të ndërmarrin plane veprimi për bashkëpunimin në fushën e shëndetësisë dhe shkencave mjekësore, të cilët do të përmbajnë aktivitetet e parashikuara në marrëveshje.
Ministria e Shëndetësisë dhe Mbrojtjes Sociale e Shqipërisë dhe Ministria e Shëndetësisë e Kosovës, bazuar në këtë marrëveshje, do të ngrenë një Komitet të Përbashkët Monitorimi dhe Koordinimi, me qëllim vlerësimin e prioriteteve, në kuadër të bashkëpunimit mes dy vendeve.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.