Thirrje për G7 – Kërkesat nga Oxfam dhe organizata të tjera për ndryshimin klimatik
Organizatat jo-qeveritare i bënë thirrje vendeve kryesore të industrializuara të Botës, që të angazhohen në luftën kundër ndryshimit klimatik, ndërkohë që dita e parë e samitit të G7 përfundoi.
Bisedimet në ditën e parë në Siçili, vunë në dukje mosbindjet e Presidentit të Shteteve të Bashkuara Donald Trump, mbi tregtinë dhe ndryshimin klimatik.
Liderët europianë shpresonin që samiti të bindte Trump për të zbutur qëndrimin e tij. Ndërsa këndvështrimi i presidentit po ndryshon, këshilluesit e Shtëpisë së Bardhë thonë se Trump do të vendosë përsëri interesat e Shteteve të Bashkuara përpara.
Zyrtarët e Oxfam, deklarojnë se pozita e Shteteve të Bashkuara mbi ndryshimin klimatik do të ketë pasoja katastrofike dhe shtojnë se organizatat shqetësohen se Trump do të tërheqë vendin nga marrëveshja e Parisit mbi klimën.
Organizata Global Citizen, shprehu shqetësime se komunikata përfundimtare e grupit të shtatë ekonomive më të mëdha të botës, do të jetë më e dobët se ajo e samitit të kaluar në Japoni.
Global Citizen që ofron ndihma ushqimore në vendet më të varfra të botës, bëri thirrje që liderët e shtatë vendeve të mbajnë premtimet e tyre mbi luftën kundër urisë, që ka dalë jashtë kontrollit në Afrikë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.