TI për BQE: “Të rrisë llogaridhënien, ka devijuar në vendimmarrje politike”
Banka Qendrore Europiane duhet të shtojë mbikëqyrjen dhe llogaridhënien, pasi ka devijuar në fushën e vendimmarrjes politike, thekson Transparency International.
Ndërkohë që pavarësia e limiton llogaridhënien e Bankës Qendrore Europiane ndaj publikut, institucioni duhet të kompensojë duke rritur transparencën, publikuar më shumë vendime dhe opinione, fuqizuar rregullat e integritetit dhe duke u bërë më e hapur mbi zgjedhjet politike që përballet, thekson organizata me seli në Berlin.
Transparency International veçoi rolin e BQE në programin e shpëtimit të Greqisë, duke theksuar se ka bërë zgjedhje politike në vend që të ndërmarrë detyrat teknike. “Fuqitë e lira të veprimit kanë bërë që BQE të shkaktojë presione te bankat greke ndërkohë që negocionte reformat e programit të shpëtimit me Qeverinë, duke u pozicionuar si Troika e kreditorëve ndërkombëtar. Veprime të tilla mund të ndodhin përsëri në negociatat aktuale të Greqisë dhe me rikapitalizimin e huadhënësit “Monte dei Paschi di Siena”, shkruan Tranparency International.
Organizata shton se Institucioni në Frankfurt mund të përballet me një rënie të konsiderueshme në besimin publik. Banka Qendrore Europiane e pranoi raportimin e organizatës dhe bëri të ditur se ka ndërmarrë disa nga hapat e rekomanduara.
“Disa nga rekomandimet tejkalojnë mandatin e BQE dhe nuk përsfhihen në traktat. Disa pika të tjera janë zbatuar, si publikimi i vendimeve, opinioneve si dhe ofrimi i informacioneve nga takimet me përfaqësues të industrive”, përgjigjet Banka Qendrore Europiane.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.