TIA, fitim rekord në 2018 – Në dy vjet, ka shpërndarë 23 mln euro dividendë

Kompania që menaxhon aeroportin ndërkombëtar të Tiranës ka arritur një fitim rekord prej afro 20 milionë eurosh për vitin 2018. Sipas dokumentacionit financiar, fitimi i Tirana International Airport u rrit më tej nga niveli prej 18.8 milionë eurosh i vitit 2017.

Ndërkohë, aksioneri i kompanisë, kompania e regjistruar në Singapor Real Private Fortress Limited për të dytin vit radhazi po vjel frutet e fitimeve, përmes shpërndarjes së dividendëve. Për vitin 2018, aksioneri ka vendosur të ndajë dividendë në vlerën e 8 milionë eurove, ndërsa diferenca do të vazhdojë të qëndrojë në bilanc si fitim i mbajtur. Vitin e kaluar, TIA kishte shpërndarë dividendë në vlerën e 15 milionë eurove, që e çon shumën totale të fitimeve të tërhequra nga aksioneri i vetëm në 23 milionë euro për dy vjet.

Real Fortress Private Limited e bleu kompaninë koncesionare TIA në tetor të vitit 2016, për 82.25 milionë euro. Në vetëm dy vjet, aksionerët e rinj kanë marrë mbrapsht rreth 28% të vlerës së investimit për blerjen e TIA-s. Po të shtojmë edhe 15 milionë euro fitime të mbajtura, tashmë kompania nga Singapori ka arritur të sigurojë afërsisht 46% të shumës që pagoi për ta blerë koncesionin e aeroportit të Tiranës. Nëse tendenca e fitimeve do të jetë në linjë me vitet e fundit, me siguri që investimi do të rezultojë shumë fitimprurës. Numri i pasagjerëve po rritet vit pas viti, falë zgjerimit të tregut të fluturimeve dhe mungesës së aeroporteve konkurruese. Vitin e kaluar, nga aeroporti i Tiranës udhëtuan rreth 3 milionë pasagjerë, 12% më shumë krahasuar me vitin 2017.

Sipas marrëveshjes koncesionare me qeverinë shqiptare, të amenduar në vitin 2016, TIA do të ketë të drejta mbi Aeroportin e Tiranës deri në vitin 2027. Por, në rast se ndërkohë do të nisin fluturime tregtare ndërkombëtare nga një aeroport tjetër në Shqipëri përpara vitit 2025 (përveç atij të Kukësit) kompania mund të përfitojë zgjatje të afatit të koncesionit, sipas një skeme të përcaktuar në marrëveshje. Sidoqoftë, gjasat që të kemi një aeroport të dytë funksional për fluturime ndërkombëtare deri në vitin 2025 janë të pakta. Negociatat me një konsorcium investitorësh turq për të ndërtuar aeroportin e Vlorës dështuan dhe qeveria shqiptare ka vendosur të hapë një garë ndërkombëtare për këtë qëllim. Por, ndërkohë i gjithë procesi do të kërkojë disa vite kohë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.