Tirana me godinë të re Bashkie. Kryetari Veliaj njofton hapjen e tenderit

Kryetari i Bashkisë Erion Veliaj ka shpjeguar nëpërmjet një postimi në rrjete sociale se në 100 vjetorin e Tiranës si kryeqytet lind nevoja për një godinë të re që i përshtatet periudhës së shekullit të 21.

Numri një i kryeqytetit ka bërë me dije se kjo ndërtesë e re do të jetë pa gjenerim karboni (carbon neutral) dhe tërësisht e pavarur nga energjia e rrjetit (net-zero energy building).

Në këtë mënyrë, Veliaj ka bërë thirrje të hapur për të gjithë studiot e projektimit në mënyrë që të paraqesin projektet e tyre, ku nëpërmjet konkursit do të zgjidhet edhe ideja më e mirë.

Postimi i plotë:

“Sot, pas 100 vitesh kryeqytet, me sfida, zhvillim dhe histori, Bashkia Tiranë vazhdon traditën e konkurseve të hapura të arkitekturës duke shpallur garën për projekt idenë e dizajnit të Bashkisë së re të Tiranës.

Godina e re do të ngrihet në Bulevardin e Ri të Tiranës, qendrën administrative të kryeqytetit për 100 vitet e ardhshme.

Ftojmë të gjithë arkitektët dhe studiot e projektimit, lokale dhe ndërkombëtare të bëhen pjesë e këtij konkursi për një ndërtesë të re bashkëkohore dhe të përshtatshme për qeverisjen lokale të shekullit të 21-të: pa gjenerim karboni (carbon neutral) dhe tërësisht e pavarur nga energjia e rrjetit (net-zero energy building). #Tirana100 – Bashkia e re – 0 impakt mjedisor

Më shumë informacion mund të gjeni në faqen: competitions.tirana.al! Për aplikimet [email protected]“, njofton Veliaj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.