Tiranë-Elbasan mbyllet në afat-Balluku: Përfundon plotësisht në fund të muajit maj!

Pas rrëshkitjes së masivit shkëmbor në aksin Tiranë-Elbasan, ka përfunduar ndërtimi i tunelit panoramik, që bën të mundur eleminimin e rrezikut. Ministrja e Infrastrukturës dhe Energjisë, Belinda Balluku inspektoi përfundimin e punimeve, ndërsa solli në vëmendje faktin se ndërtimi i rrugës Tiranë-Elbasan nisi në mungesë të një studimi gjeologjik, por sipas saj tashmë aksi po shkon drejt përfundimit të plotë të punimeve që është fundi i muajit maj, duke u përmbyllur një nga veprat infrastrukturore më të zvarritura.

“Është një investim prej 458 milionë lekësh i cili është mbaruar para aftit dhe faktikisht është pjesa më e gjelbëruar e këtij aksi. Kjo është një vepër shumë e rëndësishme e aksit Tiranë-Elbasan, i cili siç dihet tashmë nga të gjithë ishte një aks problematik për shkak të mungesës së studimit gjeologjik në fazat fillestare, por gjithçka po përmbyllet me sukses dhe jemi në pritje që të përmbyllim këtë projekt ashtu siç kemi premtuar në fund të majit” tha ministrja.

E pranishme në inspektim ishte dhe drejtoresha e ARRSH-së, Sonila Qato, e cila tha se tuneli i ndërtuar është një vepër arti e cila është e plotësuar me të gjithë komponentët e saj.

“Kanë përfunduar punimet e veprës së artit për stabilizimin e rrëshqitjes në kilometrin 17 nga Tuneli në Elbasan, në këtë aks të rëndësishëm rrugor. Tani më i gjithë aksi është në përdorim të mjeteve dhe të përdoruesve të rrugës” tha Qato.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.