Tiranë, hapen 2,087 biznese të reja në janar-qershor – Pandemia nxit dinamika të forta në ekonominë e kryeqytetit, çelen mbi 1.000 sipërmarrje shërbimesh

Pandemia ka vijuar të shkaktojë dinamika të forta në ekonominë e kryeqytetit veçanërisht përsa i përket çeljeve të bizneseve të reja, kryesisht për shkak të rrugëve innovative që duhet të përshtatin kompanitë për shkak të kufizimit të lëvizjeve. Bashkia e Tiranës raporton se gjatë tremujorit të dytë të këtij viti janë hapur 2.087 biznese të reja. Ritmi është  përafërt me tremujorin e parë të këtij viti, kur numri i bizneseve të reja të regjistruara në Tiranë ishte 2,061, por shumë më i lartë nga tremujorët e mëparëshëm, kur numri i tyre luhatet në një vlerë mesatare prej rreth 1.700 subjektesh në tremujor. Mbi 1 mijë prej këtyre bizneseve të reja janë njësi shërbimesh, ndërsa rreth 600 janë njësi shitjesh me pakicë. 354 prej kompanive  të reja janë subjekte sekondare, të dominuara nga njësitë e shitjes me pakicë.

Diçka më e qetë ndërkohë shfaqet dinamika e bizneseve të mbyllura, përtej pritshmërive fillestare që Pandemia do detyrojë shumë kompaninë të ndërprisnin aktivitetin. Trendi I mbylljes së kompanive rezulton I përafërt me atë të viteve të mëparshme. Sipas shifrave të Bashkisë Tiranë, gjatë tremujorit të dytë të këtij viti janë mbyllur në total 589 sipërmarrje, ndërsa në tremujorin e parë 482. Për efekt krahasimi, shifrat tregojnë se në tremujorin e dytë 2019 janë mbyllur në Tiranë 610 biznese, ndërkohë që në vitin 2020 shifra është 372.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.