Tjetër ankesë për Kardhiq-Delvinë – Pas anulimit të tunelit, tenderi 16.5 mln lekë për supervizimin e punimeve, në KPP

Pas anulimit të tenderit për ndërtimin e tunelit Kardhiq-Delvinë, një tjetër ankesë për këtë lot të rrugës është regjistruar pranë Komisionit të Prokurimit Publik. Është kompania IKN ‘Instituti i Konsulencës në Ndërtim’, që ka depozituar ankesë për procedurën tenderuese të zhvilluar nga Autoriteti Rrugor Shqiptar për supervizimin e punimeve që do të kryheshin në këtë segment të rrugës.  Ankesa është regjistruar në datën 20 shtator, ndërkohë që referuar procedurës së shpallur  nga ARRSH në maj të këtij viti, fondi limit i vënë në dispozicion ishte 16.5 mln lekë.

Ankimi i procedurës vjen pak ditë pasi Ministria e Infrastrukturës dhe Energjisë njoftoi anulimin e tenderit të punimeve, me argumentin e mungesës së fondeve. Por, procedura e prokurimit publik për këtë aks është shoqëruar me një sërë zhvillimesh, të cilat kulmuan me vendimin e Komisioni i Prokurimit Publik që pranoi ankesën e një bashkimi operatorësh, të cilët u ankuan për skualifikuan në mënyrë të padrejtë nga gara për tenderine  ndërtimit të tunelit.

Ata kishin ofruar 1.78 mld lekë për realizimin e punimeve, por ARRSH, pasi skualifikoi nga gara edhe 4 operatorët e tjerë pjesëmarrës në garë, shpalli fitues konsorciumin që ofroi 2.29 mld lekë. KPP I kërkoi ARRSH-së të kualifikonte operatorët me ofertën më të ulët, por vendimi për anulimin e tenderit  zhbën gjithë procesin, që do të duhet të kryhet në një moment të pacaktuar nga qeveria. Punimet në aksin Kardhiq-Delvinë kanë nisur në vitin 2007, por përfundimi i tyre është zvarritur prej vitesh. I gjithë segmenti ka një gjatësi prej 34 km, ndërkohë që deri më tani kanë përfunduar 7.6 km nga Ura e Kardhiqit drejt Fushë-Bardhës si dhe 9.7 km nga Delvina në drejtim të Vergos.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.