Tjetër armë në luftën tregtare – Administrata Trump po mendon të ç`listojë kompanitë kineze nga bursat

Presidenti amerikan Donald Trump po mendon lëvizjen e radhës, që do të përshkallëzonte tej mase luftën tregtare. Sipas tre burimeve të ndryshme për Reuters, administrata amerikane po vlerëson idenë e ç`listimit të kompanive kineze nga bursat amerikane. Kjo lëvizje do të përkthehej në një përshkallëzim radikal të tensioneve mes dy ekonomive më të mëdha të botës.

Nga ana tjetër, burimet thonë për Reuters, se, një lëvizje e tillë është pjesë e një strategjie të gjerë për të kufizuar disi investimet kineze në tokën amerikane, por edhe si pasojë e shqetësimeve në rritje në lidhje me sigurinë, duke dyshuar te aktiviteti i këtyre kompanive. Pjesa më e madhe e indekseve të tregjeve kryesore të aksioneve ranë menjëherë pas publikimit të këtij lajmi.

Kjo vjen gjithashtu vetëm pak ditë përpara fillimit të festimeve  për lindjen e Republikës Popullore. Festimet do të çojnë në mbylljen e ekonomisë së dytë më të madhe në botë për plot 1 javë, çka do të shkaktojë trazira në tregjet nëpër botë. Pas lajmit, rënie pësuan gjithashtu edhe aksionet e disa prej kompanive më të mëdha kineze, si Alibaba.

Nga ana tjetër, bisedimet mes dy ekonomive më të mëdha të botës pritet të rinisin më 10 Tetor, pas muajsh pezullim. Ideja e ç`listimit të kompanive kineze mund të jetë edhe një manovër për të përfituar sa më shumë nga këto bisedime.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.